Koronavirus pandemiyasının iqtisadi aktivliyi azaltmasına baxmayaraq “AccessBank” portfelini artıra bilib.

Marja Bankın rüblük hesabtalarına istinadən xəbər verir ki,  2021-ci ilin ilk 6 ayı ərzində “AccessBank”ın kredit portfeli (müştərilərə verilmiş kreditlər) 10 milyon 325 min manat artaraq 30 iyun 2021-ci il tarixində 545 milyon 630 min manata çatıb. Bank ötən ilin sonunda 535 milyon 305 min manat kredit portfelinə malik idi. O cümlədən, istehlak kreditləri portfeli 12 milyon 709 min manat artaraq 63 milyon 846 min manata yüksəlib, biznes kreditləri portfeli 1 milyon 874 min manat azalaraq 474 milyon 813 min manata, daşınmaz əmlak kreditləri portfeli isə 510 min manat azalaraq 6 milyon 971 min manata düşüb.

2021-ci ildə “AccessBank” 272 milyon manat məbləğində kredit verib. Bu da 2020-ci ilin eyni dövrü ilə müqayisədə 113,6 milyon çoxdur.

QİYMƏTLİ KAĞIZLARA İNVESTİSİYANI KƏSKİN ARTIRIB

Bu il “AccessBank”  qiymətli kağızlara inestisiyalarını 4,5 dəfə artıraraq  3 milyon 509 min manata çatdırıb.

Ötən ilin sonu ilə müqayisədə “AccessBank”da depozitlər 67 milyon 630 min manat artaraq 625 milyon 918 min manata, o cümlədən fiziki şəxslərin depozitləri 37 milyon 867 min manat artaraq 509 milyon 423 min manata, hüquqi şəxslərin depozitləri isə 29 milyon 763 min manat artaraq 116 milyon  495 min manata yüksəlib.

50 MİLYON MANATDAN ÇOX GƏLİR

2021-ci ilin 1-ci yarısında “AccessBank”ın cəmi əməliyyat gəlirləri (faiz və qeyri-faiz gəlirləri) 50 milyon 109 min manat, cəmi əməliyyat xərcləri (faiz və qeyri-faiz xərcləri)  51 milyon 554 min manat təşkil edib. Depozit faizlərinin ödənilməsi üzrə xərclərinin yüksək olması və mümkün zərərlər üçün yaradılan məqsədli ehtiyatlara ayırma ilə əlaqədar olaraq Bank ilk 6 ayı 2 milyon 24 min manat xalis zərər ilə bağlayıb. “AccessBank”ın müştərilərə verdiyi kreditlər və qiymətli kağızlara investisiyaları artdığından qarşıdakı dövrlərdə Bankın faiz gəlirlərinin artacağı və xərclərini artıqlaması ilə ödəyəcəyi gözlənilir.

"AccessBank" 30 İyun 2021-ci il tarixində 76 milyon 179 min manat məcmu kapitala malik olub, bu da minimal tələbdən (50 milyon manat) çoxdur.

"AccessBank" 8 xarici investora məxsusdur. Bankda ən böyük paylar Asiya İnkişaf Bankına (19.90%),  Avropa İnvestisiya Bankına (17.39%) və Dünya Bankının törəmə təşkilatı olan Beynəlxalq Maliyyə Korporasiyasına  (16.56%) məxsusdur.