Dünyada qaçqın və məcburi köçkünlərin sayı son 10 ildə ikiqat artıb.

Marja BMT-nin Qaçqınlar üzrə Ali Komissarlığına (UNHCR) istinadla xəbər verir ki, hazırda rekord həddə - 82 milyon nəfərə çatan didərginlərin sayındakı artıma koronavirus pandemiyası və onun gətirdiyi məhdudiyyətlər də təsir edə bilməyib. Təkcə ötən il 11,2 milyon şəxs öz ölkəsini və yaşadığı yeri tərk edərək, özünə sığınacaq axtarmağa məcbur olub.

BMT-nin aidiyyəti qurumunun Qlobal Tendensiyalar Hesabatında qeyd olunur ki, hazırda dünyada didərgin düşmüşlərin 26,4 milyon nəfəri qaçqın, 48 milyon nəfəri məcburi köçkünlərdir. Bundan başqa, 4.1 milyon nəfər sığınacaq axtaran, 3,9 milyon nəfər də məcburi xaricə getməli olan Venesuela vətəndaşları var. Qaçqınların 20,7 milyon nəfəri BMT-nin Qaçqınlar üzrə Ali Komissarlığının, 5,7 milyon Fələstinli isə BMT-nin Yaxın Şərqdəki Fələstinli Qaçqınlara Kömək və Yardım Agentliyinin mandatı altındadır.

Qaçqın və məcburi köçkünlərin didərgin düşdükləri və yerləşdikləri ölkələrin də coğrafiyası fərqlidir. Qaçqınların 68%-i, yəni böyük əksəriyyəti təkcə 5 ölkədəndir - Suriya (6,7 milyon), Venesuela (4 milyon), Əfqanıstan (2,6 milyon), Cənubi Sudan (2,2 milyon), Myanmar (1,1 milyon). 5 Afrika ölkəsindən  - Konqo, Somali, Sudan, Mərkəzi Afrika Respublikası və Eritreyadan qaçqın düşənlərin cəmi sayı isə 3,5 milyon nəfəri keçib.

Hazırda qaçqınların ən çox yerləşdiyi ölkə Türkiyədir. Əksəriyyəti Suriyalılar olmaqla, hazırda 3,7 milyon şəxs bu ölkədə məskunlaşıb.Daha sonrakı yerlərdə Kolumbiya (1,7 milyon), Uqanda (1,4 milyon), Pakistan (1,4 milyon) və Almaniya (1,2 milyon) gəlir. 2020-ci ildə didərginlərin 3,4 milyon nəfəri öz yaşayış yerlərinə qayıda bilib ki, bunların da əksəriyyəti məcburi köçkünlər (3,2 milyon), yalnız kiçik hissəsi qaçqınlardır (250 min).

2018-2020-ci illərdə qaçqın və məcburi köçkün kimi doğulan uşaqların sayı 1 milyona yaxındır. BMT həmçinin, koronavirus pandemiyasının gətirdiyi çətinliklərlə də bərabər, hazırda dünyada 120-124 milyon nəfər insanın həddən artıq kəskin yoxsulluq səviyyəsində yaşadığını qeyd edir.