Təhsil Tələbə Krediti Fondu növbəti tədris ilindən daha çox tələbənin maliyyələşməsini həyata keçirəcək.

Bunu təhsil naziri Emin Əmrullayev bu gün keçirdiyi mətbuat konfransında deyib.

O bildirib ki, Fərmandan gələn məsələlər müəyyən qaydalarla tənzimlənəcək, bu qaydalar növbəti bir ay ərzində hazırlanıb Nazirlər Kabinetinə veriləcək və təsdiq ediləcək:

“Bu kreditlər çox aşağı, təxminən 2 faiz olacaq. Kreditlər sosial həssas qrupdan olandan üçündür. Sosial həssas qrupdan olmayanlar üçün isə qaydalar açıqlanacaq. Ehtiyacla yanaşı, giriş ballarına da baxılacaq, yüksək nəticə bizim üçün əsas şərtlərdən olacaq. Müvəffəqiyyət göstərici olan və kredit alan tələbə ilə bağlı müvafiq güzəştlər nəzərə alınacaq. Amma vətəndaş məsuliyyəti və dayanıqlılıq baxımından, ödənilmiş maliyyə geri qaytarıldıqca digər tələbələrin oxuma şansı da olacaq. Gələcəkdə Fondun maliyyəsi daha da artırıla bilər. Uzunmüddətli kredit olacaq, tələbə təhsili bitirəndən təxminən 20 il ərzində kreditini hissə-hissə ödəyəcək. Bu və ya digər səbəbdən ödəyə bilmədiyi, hərbidə olduğu, işləmədiyi və digər hallarda kiçik müddətli möhlət hüququ da veriləcək”.

“Təhsil kreditində faiz dərəcəsi çox az olacaq”

Emin Əmrullayev, "Təhsil Tələbə Kredit Fondu Azərbaycandakı universitetlər üçün nəzərdə tutulub, xaricdə təhsil alanlar üçün yox” - deyib.

O bildirib ki, tələbə təhsil haqqı ödəyə bilməyəndə bu universitet üçün də problem olur: “Amma təhsil krediti universitet üçün 70-80 faiz maliyyə dayanıqlığı deməkdir. Bu kredit istehlak kreditlərindən fərqli olacaq, orada faiz iki rəqəmli olur, amma burada faiz dərəcəsi sıfıra yaxın, yəni çox az olacaq. Amma bu, vətəndaşı məsuliyyətdən azad etmir, bu kredit aləti ilə vətəndaş həyatının növbəti mərhələlərində məsuliyyətli olmalıdır. Tələbə krediti qarşılıqlı inam və tələbə dövründən sosial məsuliyyəti dərk etməyə kömək edəcək, burada 20 illik müddətdən söhbət gedir”.

"Kredit tələbəyə yox, onun oxuduğu təhsil müəssisəsinə ödəniləcək"

“Himayəçilər Şurası tərəfindən təhsil kretinin yüksək həddi müəyyən ediləcək”, - Emin Əmrullayev mətbuat konfransında bildirib.

O deyib ki, kreditin məbləği təhsil haqqı məbləğindən artıq olmayacaq: “Belə də ola bilər ki, təhsil haqqının 80 faizi ödənilsin. Bu, daha çox əlavə kömək üçündür”.

Nazir deyib ki, kredit tələbəyə yox, onun oxuduğu ali və ya orta ixtisas təhsil müəssisəsinə köçürüləcək: “Bu da yenə müzakirə mövzusudur, öz hesabına oxuyan tələbələr təhsil haqqının müəyyən qismini özü ödəyirsə, müəyyən qismini də kreditlə ödəyə bilər”.

Həmçinin oxu

"Dərslərini yaxşı oxuyan tələbəyə faiz dərəcələrində güzəşt ediləcək"

APA