Azərbaycan Sahibkarlığın İnkişafı Fondu məbləğ üzrə güzəştli kreditlərin 84%-ni orta, kiçik və mikro şirkətlərə (subyektlərə) verib.

Marja xəbər verir ki, bunu keçirilmiş mətbuat konfransında Azərbaycan Respublikasının Sahibkarlığın İnkişafı Fondunun İdarə Heyətinin sədri Kənan Nəcəfov bildirib.

Onun sözlərinə görə, güşəştli kreditlərin 16%-ni böyük, 56%-ni orta, 16%-ni kiçik və 12%-ni də mikro subyektlər əldə edib.

Say üzrə ən çox güzəştli kreditlər mikro sahibkarlıq subyektlərinə ayrılıb (say üzrə güzəştli kreditlərin 90,1%-i). Say üzrə güzəştli kreditlərin 6.3%-i kiçik, 3.1%-i orta və 0,6%-i böyük biznesə verilib.

Beləliklə, say üzrə 3.7% güzəştli kreditlər, məbləğ üzrə güzəştli kreditlərin 72%-nə bərabər olub. Başqa sözlə,  ən çox sayda güzəştli kredit mikro və kiçik sahibkarlara verilsə də, məbləğ üzrə cəmi güzəştli kreditlərin 72%-ni orta və iri sahibkarlıq subyektləri əldə edib. Bu, iri və orta şirkətlərə daha böyük məbləğlərdə güzəştli kreditlərin ayrılması ilə əlaqədardır. Belə ki, güzəştli kreditlərin 73%-i böyük həcmli kreditlər olub.

Kənan Nəcəfov Marjanın sualını cavablandıraraq bildirdi ki, iri bizneslərə daha az kredit verməyi hədəfləyirlər:

“Bizim hədəfimiz, güzəştli kreditlərin məbləğ üzrə daha çox orta, kiçik və mikro sahibkarlara verilməsidir. Say üzrə, demək olar ki, buna nail olmuşuq - say üzrə kredilərin 90,1%-i mikro subyektlərə verilib. Biz davamlı olaraq kreditlərin daha çox orta və kiçik sahibkarların əldə etməsinə çalışırıq. Bizə hər gün müraciətlər daxil olur, müraciət orta, kiçik və mikro subyektlər tərəfindən daxil olursa, ona isti baxırıq. Əgər müraciət iri şirkətə məxsusdursa, onu həm strateji olaraq prioritet saymırıq, həm də onlarla dialoqa başlayırıq, bildiririk ki, "biz sizə kredit versək siz kiçik və mikro bizneslər üçün hansı şəraitləri yaradacaqsınız, onlar da layihənizdən bəhrələnsinlər". Açıq deyim, bizə böyük holdinqlərdən müraciət gələndə biz onlara isti baxmırıq. İri sahibkarlara daha az kredit verməyi hədəfləyirik və hazırda bunun üzərində işləyirik. Bizim prioritet orta və kiçik bizneslərdir".

Həmçinin oxu

"Seçilmiş şirkətlərin istiqrazlarını alaraq güzəştli maliyyə ayırmağı nəzərdə tuturuq"

Kənan Nəcəfov əlavə edib ki, kiçik və orta şirkətlərin daha çox güzəştli kredit əldə etmələri üçün tam şəffaflaşmaları lazımdır: "Biz sahibkarlar ilə şəffaflaşma dialoqlarını da aparırıq. Bizə biznes planlar təqdim edildikdə, sahibkarlara, idarəetmənin səmərəli və şafaf olması şərtini irəli sürürük. "Biz çox səmərəli və şəffaf fəaliyyət göstəririk, sizdən də şəffaf işləməyi gözləyirik". Gəlin bir yerdə şəffaflaşaq. Şəffaflaşma həm sahibkarların böyüməsi və gələcəkdə asan kredit ala bilmələri, həm də uçot və vergilər üçün çox vacibdir".