Yanvarın 6-da Azərbaycan Respublikasının Prezidenti İlham Əliyevin sədrliyi ilə 2020-ci ilin yekunlarına həsr olunmuş videoformatda müşavirədə İqtisadiyyat naziri Mikayıl Cabbarov bildirdi ki, işğaldan azad olunmuş ərazilərin bərpası və inkişafı ilə bağlı investisiya layihələrinin həyata keçirilməsində dövlət-özəl sektor tərəfdaşlığından geniş istifadə edilməsi, iqtisadi aktivliyin təşviq olunması məqsədilə həmin ərazilərə xüsusi güzəştli iqtisadi rejimin tətbiqi təklif olunur.

Azərbaycanın iş adamları da öz təkliflərini irəli sürməyə başlayıblar.

“İnci” Şirkətlər Qrupunun İdarə Heyətinin sədri, tanınmış iş adamı Mikayıl Yusif Marja-ya bildirdi ki, sahibkarlar işğaldan azad olunmuş ərazilərin bərpasında çox aktiv iştirak etməlidirlər:

“Bizim generalarımız döyüşdə öz sözünü dedi. Bir ölkənin iqtisadiyyat sahəsində generalları da onun iş adamlarıdır. Hərbiçi generallarımız kimi, onlar da Qarabağın yenidən qurulmasında öz sözünü deməli, güclərini, qabiliyyətlərini göstərməlidirlər. İş adamlarının bərpa layihələrində iştirakı üçün sərfəli bir mexanizim yaradılmalıdır.

Özəl sektoru cəlb etməklə Qarabağı daha qısa müddətdə yenidən qurmaq və inkişafına nail olmaq olar.   Sürətlə canlanma olacaqsa, Qarabağın Azərbaycan iqtisadiyyatına köməyi daha tez və nəzərəçarpan olacaqdır”.

Mikayıl Yusif özəl sektorunun bərpa layihələrinə cəlbi üzrə variantlardan birini də qeyd etdi:

“İşğaldan azad olunmuş ərazilərdəki yaşayış məntəqələri, o cümlədən Ağdam şəhəri yenidən qurulacaq. Tutaq ki, şəhərdə 5 mərtəbəli yaşayış binası tikiləcək. Razılaşmadan asılı olaraq, yaşayış binaları tamamilə özəl sektorun vəsaiti və ya dövlət-özəl sektor vəsaitlərilə birgə də tikilə bilər. Bu varianta görə, tikilən bunanın 1-2 mərtəbəsi özəl şirkətdə qalmalı, qalan mərtəbələr dövlətə təhvil verilməlidir. Binanı tikən özəl sektor binanın 1-ci mərtəbəsində öz mağazasını aça və ya digər şəxslərə icarəyə verə bilər.  Məsələn, bina “İnci” Şirkətlər qurupu tərəfindən tikilərsə, 1-ci mərtəbəsində “Ofisait” mağazamız  və  ya tədris mərkəzimiz yerləşə bilər. Yaşayış mərtəbələrini dövlətə təhvil verərik, dövlət də mənzilləri geri qayıdacaq ailələrə təqdim edəcəkdir. Binada  yaşayan insanlar mağazamızda və çatdırılmada işləyə bilərlər.

Xüsusilə iri mağazalar şəbəkəsi olan şirkətlər və fərdi sahibkarlar işğaldan azad olunmuş ərazilərin bərpası layihələrinə investor olaraq cəlb edilməlidirlər.  İş adamlarını cəlb etməklə dövlət büdcə vəsaitlərinə qənaət edə bilər və bərpa müddəti daha tez müddətdə yekunlaşar”.

İş adamının digər bir təklifi istehsal müəssisələrinin yaradılması ilə bağlıdır:

“İş adamlarına maksimum 2 il ərzində istehsal müəssisəsini yaradacağı şərtilə dövlət tərəfindən torpaq və digər güzəştlər təqdim oluna bilər. İş adamı da müəyyən edilən müddət ərzində istehsal müəssisəsini yaratmalı və öz ata-baba torpaqlarına qayıdacaq insanlar üçün iş yeri açmalıdır”.

Mikayıl Yusif digər şirkətləri və iş adamlarını təkliflər ilə çıxış etməyə, dövlətə kömək göstərməyə çağırdı.

Qeyd edək ki, "İnci" Şirkətlər Qrupu bu ilin Mart ayında Koronavirusla Mübarizəyə Dəstək Fonduna 30 min manat, Sentyabr ayında  Azərbaycan Ordusuna dəstək üçün Azərbaycan Respublikası Silahlı Qüvvələrə Yardım Fonduna 30 min manat, Dekabr ayında da “YAŞAT” Fonduna 30 min manat ianə köçürmüşdür.