Kiçik sahibkarlıq fəaliyyəti ilə məşğul olan  Rzayev Qalib Telman oğlu  sərtləşdirilmiş karantin rejmi dövründə çətinlik ilə qarşılaşdıqlarını bildirib.

Kiçik sahibkar Marja-ya müraciətində yazıb:

"Bakı şəhəri, Nəsimi rayonu, 20 yanvar 1 küçəsində (Şamaxinka adlanan ərazidə) geyim mağazası işlədirik. Xüsusi karantin rejimində yerində xidməti dayandırıb onlayn satışa keçirik. İnstagram səhifəmizdən bəyəndikləri malı müştərilərimizin bəziləri gəlib mağazanın qarşısından götürür və ya ölçüsü düz gəlməyəndə gətirib dəyişirlər. Ancaq mağazanın qarşısında müştəriyə xidmət göstərdiyimizə görə polis əməkdaşları gəlib icarədara və işçilərə cəmi 1000 manat məbləğində cərimə yazmışlar. Nəzərinizə çatdırım ki, müştəri mağazanın içərisinə keçməyib.

Biz (icaze.e-gov.az) portalından qeydiyyatdan keçmişik və icazəmiz var. Xahiş edirik maddi vəziyyətimizin ağır olduğu bir dövrdə bizə yazılan bu cərimə silinsin. Ən yaxşı halda ayda bir dəfə mağazamızın müştərisi olan şəxsə mağazanın qarşısında, açıq havada xidmət göstərməyimizə görə bizi xəstəliyin yayılmasında günahlandırırlar və cərimələyirlər. Hansıki hər bir şəxs gündə bir neçə dəfə qapalı məkanda marketdən istifadə edir.

Xahiş edirik köməklik edin. Süni maneələrdən canımız qurtarsın. Mağazanın xaricində göstərdiyimiz xidmətə görə bizi cərimələməsinlər. Bu problemlə gündə minlərlə kiçik sahibkar üzləşir. Son bir ildə xüsusi karantin rejimində, sahibkarların maddi vəziyyətinin ağır olduğu bir dövrdə, karantin rejimin fürsət bilib bizə əlavə problemlər yaratmasınlar. Buna bir nəzarət olmasını istərdik.

Xahiş edirik köməklik edin. Kiçik sahibkar kimi məhv olmayaq, böyüyə bilək.

Növbəti gün 19-cu Polis Bölməsindən bizə bildirdilər ki, işçimizin biri mağazanın qarşısındakı müştəriyə xidmət göstərdiyinə görə İcarədar Rzayev Qalib Telman oğluna 200 manat, kassir Allahverdiyev Süleyman Qulu oğluna 200 manat, satıcı Rzayev Mehman Tofiq oğluna 200 manat və İsmayılov Ruslan Ənvər oğlunada 200 manat cərimə yazıblar. Sizdən xahiş edirik ki, bu haqsız yazılan cərimələrin silinməsində bizə köməklik göstərəsiniz. Bu ağır vəziyyətimizdə kiçik sahibkarlara qarşı aqressiv münasibətlərə son qoyulsun. Ümid edirik ki, bizə köməklik göstərəcəksiniz".