Bank of Baku ASC 2020-ci ilin 9 ayını (yanvar-sentyabr) 8 milyon 612 min manat xalis mənfəət ilə başa vurub. Ötən ilin eyni dövründə xalis mənfəətin yüksək olması (32 milyon 276 min manat) ödəmə vaxtı keçmiş kreditlərin bir hissəsinin yığılması ilə əlaəqdar olaraq  əvvəlki dövrlərdə mümkün zərərlər üçün yaradılmış ehtiyatdan azad olmuş vəsait ilə əlaqədar idi. 2020-ci ilin 9 ayında Bank of Bakunun gəlirləri və cari biznes fəaliyyətinin nəticəsini daha həqiqi əks etdirən əməliyyat mənfəəti artıb.  

Marja xəbər verir ki, 2020-ci ilin 9 ayında Bank of Bakunun cəmi əməliyyat gəlirləri (faiz və qeyri-faiz gəlirləri) 47 milyon 681 min manat, cəmi əməliyyat xərcləri (faiz və qeyri-faiz xərcləri) 36 milyon 572 min manat təşkil edib. Gəlirlər xərcləri üstələdiyindən bankın 11 milyon 109 min manat əməliyyat mənfəəti formalaşıb. Eyni zamanda, mümkün zərərlər üçün yaradılan məqsədli ehtiyatdan 426 min manat azad olub və cəmi mənfəət 11 milyon 535 min manata yüksəlib. Bank mənfəətindən 2 milyon 923 min manat vergi ödədiyindən cari iln 9 ayını 8 milyon 612 min manat xalis mənfəət ilə bağalyıb.

Müqayisə üçün qeyd edək ki, 2019-cu ilin 9 ayında Bak of Bakunun cəmi əməliyyat gəlirləri 38 milyon 21 min manat, cəmi əməliyyat xərcləri 31 milyon 475 min manat, əməliyyat mənfəəti 6 milyon 546 min manat təşkil etmişdi. Mümkün zərərlər üçün yaradılan məqsədli ehtiyatdan 34 milyon 184 min manat azad olmuş və mənfəət 40 milyon 730 min manata yüksəlmişdi. Bank of Baku 8 milyon 454 min manat mənfəət vergisi ödədiyindən həmin dövrü 32 milyon 276 min manat xalis mənfəət ilə bağlamışdı.

GƏLİRLƏRİ VƏ ƏMƏLİYYAT MƏNFƏƏTİ ARTIB

Bank of Bakunun ötən ilin 9 ayında faiz gəlirləri 31 milyon 683 min manat ikən, 2020-ci ilin 9 ayında 40 milyon 133 min manat, ötən ilin 9 ayında qeyri-faiz gəlirləri 6 milyon 339 min manat ikən, 2020-ci ilin 9 ayında 7 milyon 548 min manat təşkil edib. Gəlirlərin artması ilə əlaqədar olaraq Bank of Bakunun əməliyyat mənfəəti 70% artaraq 6 milyon 546 min manatdan 11 milyon 109 min manata yüksəlib. Qeyd edək ki, əməliyyat mənfəəti Bankın cari biznes fəaliyyətinin nəticəsini daha həqiqi əks etdirir.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

Ötən ilin sonu ilə müqayisədə 2020-ci ilin 9 ayı ərzində Bank of Bakunun cəmi aktivləri 13 milyon 102 min manat və ya 3,4% artaraq 394 milyon 196 min manata, müştərilərə verilmiş cəmi kreditlər isə 28 milyon 338 min manat və ya 8,4% artaraq  366 milyon 496 min manata yüksəlib.

MƏCMU KAPİTALI ARTIB

2020-ci ilin 9 ayı ərzində Bank of Bakunun məcmu kapitalı 29 milyon 74 min manat artıb. Belə ki, 30 Sentyabr 2020-ci il tarixində Bank of Baku 83 milyon 298 min manat məcmu kapitala malik olub. Bank ötən ilin sonunda 54 milyon 224 min manat məcmu kapitala malik idi.