“Biz artıq bir neçə dəfə bu məsələ ilə öz mövqeyimizi açıqladıq. Mən də bunu söylədim. Mən yenə də öz fikrimdə qalıram. Demək olar ki, bütün yerlərdən bizə ünvanlanan mesajlar - təkcə bu dönəmdə deyil, bundan əvvəlki dönəmdə də belə idi ki, bu məsələnin hərbi yolla həlli yoxdur. Biz də buna vaxtından əvvəl reaksiya vermirdik. Onlar belə deyirlər, desinlər. Onların fikri budur, bizim də fikrimiz budur ki, bu münaqişə sülh yolu ilə həll edilsin, ancaq həll edilsin. Amma biz nə görürük?! 30 il bu heç bir nəticə vermədi”.

Bunu Azərbaycan Prezidenti İlham Əliyev oktyabrın 15-də Türkiyənin NTV televiziyasına müsahibəsində deyib.

Azərbaycan Prezidenti bildirib ki, 30 il ərzində bu atəşkəs rejimində Ermənistan işğal edilmiş yerlərdə güclü mühəndis-istehkam qurğuları yerləşdirib: “Bu gün Azərbaycan Ordusunun peşəkarlığı və cəsarəti nəticəsində biz o istehkamları yarırıq. 30 il ərzində Ermənistan sülhə yox, bu torpaqları daim işğal altında saxlamağa cəhd göstərib. Çünki əgər sülhə meylli olsaydı, niyə Füzulidə, niyə Cəbrayılda, yaxud da Ağdam istiqamətində bu istehkamları qursun? Qurursan ki, daim bu torpaqları öz nəzarətində saxlayasan. Yəni atəşkəs müddəti buna gətirib çıxardı. Bundan sonra Ermənistan idarəetməsi daha da azğınlaşdı. Baxın, Paşinyan nələr deyir, onun Müdafiə naziri nə deyir. Müdafiə naziri deyirdi ki, biz Azərbaycana qarşı yeni torpaqlar uğrunda yeni müharibə aparacağıq. Bu bizə qarşı açıq hədə idi. Paşinyan deyirdi ki, “Qarabağ Ermənistandır və nöqtə”. Yəni ki, 1 sm torpaq bizə verilməyəcək. O zaman hansı sülh yolları ilə bunun həlli mümkündür? Mən isə deyirdim ki, biz indi məsələnin hərbi yollarla həll edilməsi mərhələsindəyik. Biz istəyirik ki, bu mərhələ nə qədər tez olsa, bitsin. Və ondan sonra diplomatik mərhələ başlasın. Yəni bizim yanaşmamız bu məsələ hərbi-siyasi yollarla həll edilsin. Tək hərbi yolla həll edilə bilməz. Mən bunu qəbul edirəm. Çünki fəal toqquşma mərhələsindən sonra tərəflər gərək sülh müqaviləsi haqqında düşünsünlər və bunu etsinlər. Yəni siyasi yollar olacaq. Ona görə hərbi-siyasi yol ən məqbul yoldur. Biz hərbi yolu durdurmaq istəyirik. Ancaq Ermənistan hələ də düşünür ki, itirilmiş-yəni bizim azad etdiyimiz torpaqları geri qaytaracaq. Ona görə döyüş meydanında da bizə daim hücumlar edir”.