Ev təsərrüfatlarına verilən kreditlər 4 ay geriləmədən sonra İyulda yenidən artıb. Artım ipoteka kreditləri ilə bağlıdır.

Marja Mərkəzi Banka istinadən xəbər verir ki, ev təsərrüfatlarına verilən kreditlər İyulda İyun ayı ilə müqayisədə 20 milyon 500 min manat artaraq 6 milyard 560 milyon 500 min manata çatıb.  

2020-ci ilin Fevral ayında ev təsərrüfatlarına verilən kreditlər 7 milyard 99 milyon 500 min manata çatdıqdan sonra mart-iyun aylarında 559 milyon 5 min manat azalmışdı.

İyulda ev təsərrüfatlarına verilən kreditlərin xüsusi çəkisi 44,9%-dən 45%-ə yüksəlib.

Daşınmaz əmlakın tikintisinə və alınmasına (ipoteka krediti daxil olmaqla) ayrılan kreditlər ev təsərrüfatlarına verilən kreditlərə daxildir. İyulda daşınmaz əmlakın tikintisinə və alınmasına verilən kreditlər 41 milyon 700 min manat artıb. Ev təsərrüfatlarına verilən kreditlərdəki 20 milyon 500 min manatlıq artım bu kreditlərdəki artım ilə əlaqədardır. Daşınmaz əmlakın tikintisinə və alınmasına verilən kreditlər xaric ev təsərrüfatlarına verilən kreditlər (istehlak kreditləri) 21 milyon 200 min manat azalıb. Qısası sırf istehlak kreditləri İyun ayındakı 4 milyard 572 milyon 600 min manatdan 4 milyard 551 milyon 400 min manata geriləyib.

Daşınmaz əmlakın tikintisinə və alınmasına (ipoteka krediti daxil olmaqla) ayrılan kreditlər ilk dəfə 2 milyard manat səviyyəsini keçərək 2 milyard 9 milyon 110 min manata çatıb. Martda bu kreditlər 1 milyard 989 milyon manata çatsa da aprel-may aylarında bir miqdar azalmışdı. Artım İyundan yenidən bərpa olunub.

Qeyd edək ki, İyul ayında cəmi kredit qoyuluşları 34 milyon 600 min manat artaraq 14 milyard 585 milyon 300 min manata çatıb. İyulda ticarət və xidmət sektorlarına kredit qoyuluşları azalıb, sənaye, kənd təsərrüfatı, inşaat, nəqliyyat, rabitə və energetika sektouralarına cəmi kredit qoyuluşları artıb.