“PAŞA Bank” ASC-nin Türkiyədəki törəməsi “PAŞA Yatırım Bankası” bu ilin 1-ci rübünü 8 milyon 477 min lirə (2 milyon 119 min manat) xalis mənfəətlə başa vurub.

Bankın maliyyə hesabatına görə, bu, ötən ilin eyni dövrü ilə müqayisədə 33,8% azdır.

Yanvar-mart aylarında faiz gəlirləri 28 milyon 206 min lirə (7 milyon 52 min manat, 1 il əvvələ nisbətən 24,5% az), faiz xərcləri 10 milyon 356 min lirə (2 milyon 589 min manat, 13,25% az), haqq və komissiya gəlirləri 741 min lirə (185 min manat, 35,35% az), qiymətli kağızların alqı-satqısında gəlirləri 2 milyon 77 min lirə (519 min manat, 1 il bundan əvvəl zərər olub), inzibati xərcləri 4 milyon 559 min lirə (1 milyon 140 min manat, 29,5% çox), digər gəlirləri 2 milyon 345 min lirə (586 min manat, 8 dəfə çox), digər xərcləri 5 milyon 585 min lirə (1 milyon 396 min manat, 42,2% çox), xüsusi ehtiyatlara ayırmaları 1 milyon 975 min lirə (494 min manat, 2,1% az), mənfəət vergisi ödəmələri isə 2 milyon 417 min lirə (604 min manat, 35,6% az) təşkil edib.

BANK BÖYÜYÜB

Bu il aprelin 1-nə “PAŞA Yatırım Bankası”nın aktivləri 1 milyard 900 milyon 54 min lirə (475 milyon 140 min manat) olub ki, bu da illik müqayisədə 10,1% çoxdur. Bunun 1 milyard 243 milyon 286 min lirəsi (310 milyon 822 min manat) müştərilərə verilmiş xalis kreditlərdir. Son 1 ildə Bankın kredit portfeli 17,2% böyüyüb.

Hesabat dövründə “PAŞA Yatırım Bankası”nın öhdəlikləri 13,9% artaraq 1 milyard 359 milyon 959 min lirəyə (339 milyon 990 min manat), balans kapitalı isə 1,6% artaraq 540 milyon 950 min lirəyə (135 milyon 24 min manat) çatıb.

Xatırladaq ki, "PAŞA Yatırım Bankası" 2015-ci ildə "PAŞA Bank"ın Türkiyənin "Aksoy Holdinq"inə məxsus "TAİB Bank"ın səhmlərini alması ilə yaradılıb. Onun nizamnamə kapitalı 500 milyon lirədir (125 milyon manat). Bankın səhmlərinin 50,96%-i “PAŞA Bank”a, 49%-i Bankın daxil olduğu “PAŞA Holdinq” MMC-yə, 0,04%-i isə “Aksoy Holdinq”ə məxsusdur. 

1 lirə = 0,25 manat

“Renkinq”