Azərbaycanda atmosferə atılan zərərli maddələrin böyük hissəsi avtomobillərin payına düşür.

Ekologiya və Təbii Sərvətlər Nazirliyinin Dövlət Ekspertiza İdarəsinin rəisi Mirsalam Qəmbərovun sözlərinə görə, xüsusilə Abşeron yarımadasında vəziyyət daha acınacaqlıdır:

"Ölkədə istifadədə olan avtomobillərin əksəriyyəti köhnəlib. Onlar atmosferə daha çox zərəli qaz buraxır. Artıq köhnə avtomobillərdən imtina edib elektrik və hibrid avtomobillərə keçməyin vaxtı çatıb. Biz bu məsələ ilə bağlı aidiyyəti dövlət qurumları ilə müzakirələr aparıb təkliflərimizi vermişik. Əhalinin ətraf mühitə zərərsiz yeni avtomobillərdən istifadəsini təşviq etmək lazımdır".

Avtomobil bazarı üzrə ekspert Eldəniz Cəfərovun sözlərinə görə, ölkədə istismarda olan 1 milyon 500 minə yaxın avtomobilin böyük əksəriyyəti istismar dövrünü başa vurub. Bu avtomobillər həm yol hərəkəti təhlükəsizliyinin təmin edilməsi, həm də ətraf mühitin mühafizəsi baxımından yararsızdır. E.Cəfərov bildirib ki, ölkədə vətəndaşların yeni avtomobillər alması üçün imkanlar genişləndirilməlidir:

"Stimullaşdırıcı qərarlar qəbul edilməlidir. İnsanlar şəxsi tələblərinə uyğun olaraq avtomobildən istifadə edirlər, həm də elə sahibkarlar var ki, onlar nəqliyyat vasitəsi olmadan fəaliyyət göstərə bilməzlər. Məhdudiyyətlər tətbiq etməklə kiçik sahibkarlıqla məşğul olan şəxslərə zərər vermiş olarıq.

Ona görə də vətəndaşların yeni nəqliyyat vasitəsi alması üçün şərait yaradılmalıdır. Avtomobil kreditlərinin şərtləri olduqca ağırdır. Banklar yeni avtomobil almaq istəyən şəxslərdən 40 faiz ilkin ödəniş tələb edirlər, krediti isə illik 15-17 faizlə təklif edirlər. Ona görə də vətəndaşlarımız məcbur qalaraq xarici ölkələrdən yararsız avtomobillər gətirirlər. İlk növbədə, vətəndaşlara əlverişli kredit şəraiti yaradılmalıdır. İlkin ödəniş 20 faizə, kreditin illik faiz dərəcəsi isə 9-10 faizə endirilsə, vətəndaşlar daha çox yeni avtomobillər almağa can atarlar. Bundan başqa, köhnə avtomobillərin utilizasiya olunması ilə bağlı tədbirlərin görülməsinə də ehtiyac var".