2019-cu ildə Azərbaycan bankları müştərilərə verilmiş kreditlərdən 1 milyard 421 milyon 600 min manat faiz gəliri əldə ediblər.

“Marja” Mərkəzi Banka istinadən xəbər verir ki, ötən il müştərilərə verilən kreditlərin artması ilə bərabər bankların faiz gəlirləri də artıb.

2018-ci illə müqayisədə 2019-cu ildə müştərilərə verilmiş cəmi kreditlər 2 milyard 272 milyon 600 min manat artaraq 14 milyard 900 milyon 900 min manata yüksəlib. Xalis kreditlər (kreditlər üzrə mümkün zərərlərin ödənilməsi üçün məqsədli ehtiyat xaric kreditlər) 2 milyard 302 milyon manat artaraq 13 milyard 451 milyon manata çatıb.

Müştərilərə verilmiş kreditlərin artması bankların kreditlər üzrə faiz gəlirlərinin artmasında da əks olunub. 2018-ci illə müqayisədə 2019-cu ildə kreditlər üzrə faiz gəlirləri 197.1 milyon manat artaraq 1 milyard 421 milyon 600 min manat təşkil edib. Banklar 2018-ci ildə 1 milyard 224 milyon 500 min manat kreditlər üzrə faiz gəlirləri əldə etmişdilər.

Ötən il bankların cəmi faiz və gəlirlərin bu qəbildən olan növləri üzrə gəlirləri 169.2 milyon manat artaraq 1 milyard 922 milyon 200 min manat təşkil edib.

FAİZ XƏRCLƏRİ AZALIB

2018-ci illə müqayisədə 2019-cu ildə bankların faiz və onlara bağlı xərcləri azalıb. 2018-ci ildə 581.9 milyon manat təşkil etmiş müvafiq xərclər 2019-cu ildə 547.9 milyon manata düşüb (34 milyon manat azalıb). Bankların depozitlər üzrə ödədikləri faizlər 5.4 milyon manat azalaraq 372.4 milyon manata geriləyib.

QEYRİ-FAİZ GƏLİRLƏRİ DƏ ARTIB

Ötən il bankların qeyri-faiz gəlirləri 174.6 milyon manat və ya 32% artaraq 723.7 milyon manata yüksəlib. 2018-ci ildə bankların qeyri-faiz gəlirləri 549.1 milyon manat təşkil etmişdi.

Bankların qeyri-faiz xərcləri qeyri-faiz gəlirlərini üstələyir. Ötən il bankların qeyri-faiz xərcləri 180 milyon manat artaraq 1 milyon 205 milyon manata yüksəlib.  

Faiz gəlirlərinin artması ilə bankların əməliyyat mənfəəti ötən il 154.4 milyon manat artaraq 849 milyon manata yüksəlib. Banklar 2018-ci ildə 694.6 milyon manat əməliyyat mənfəəti əldə etmişdilər.