Türkiyə Prezidenti Rəcəb Tayyib Ərdoğan yerli (milli) avtomobil layihəsini 8 il əvvəl dilə gətirmiş və  2011-ci ilin Yanvar ayında yerli avtomobil üçün "igidlərə" çağırış etmişdi. “Marja”nın məlumatına görə, bu mövzuda ilk konkret addım 2 Noyabr 2017-ci ildə atıldı və "Anadolu Grubu", BMC, "Kıraça Holding", "Turkcell" və "Zorlu Holding"dən ibarət 5 "igid" ictimaiyyətə tanıdıldı.

5 "igid" ilə imzalanan protokol ilə Sənaye və Texnologiya Nazirliyinin koordinasiyasında Türkiyənin Avtomobili Təşəbbüsü Qrupu (TOGG) yaradılıb. Qrupda 5 şirkətin hər birinin 19%, TOBB-in (Türkiye Odalar ve Borsalar Birliği) isə 5% payı var.

Türkiyənin Avtomobili Təşəbbüsü Qrupunun rəsmi “Twitter” səhifəsindən yerli avtomobillə əlaqədar ilk paylaşma edilib. Paylaşmada "Türkiyənin avtomobili ilə tanış olmaq üçün geri sayma başladı... Hər gün 14.30-da yeni bir detalı kəşf etmək üçün bizi izləməyə davam edin" mesajı yazılıb. Paylaşmada yerli avtomobilin yalnız faralarının işığının göründüyü bir fotoşəkil də yer alıb.

Türkiyənin avtomobili 27 dekabrda Rəcəb Tayyib Ərdoğanın iştirakı ilə təqdim ediləcək. Ərdoğan Türkiyənin avtomobilini Osman qazi Körpüsü üzərindən keçərək test edəcək.

Türkiyənin milli avtomobilinin dizaynını məşhur İtaliya şirkəti "Pininfarina" həyata keçirib. "Pininfarina" dünyanın ən məşhur və ən böyük avtomobil dizayn şirkətlərindən biridir. 1930-cu ildə qurulmuş şirkət məşhurluğunu "Ferrari" və "Lambhorgini" dizaynları ilə qazansa da "Fiat", "Alfa Romeo", "Lancia", "Maserati", "Cadillac", "Volvo" və "Peugeot" kimi markalara da dizaynlar edir. TOGG milli avtomobilin dizaynı üçün "Pininfarina" ilə əməkdaşlıq edib. Artıq prototip avtomobillər İtaliyadan Türkiyəyə daşınıb.

İSTEHSALI 2022-DƏ BAŞLAYACAQ

Prototipi İtaliyada istehsal edilən Türkiyənin milli avtomobilinin istehsalı 2022-ci ildə başlayacaq. Ağıllı zavodun inşasına yaxın aylarda başlanacaq. İlk avtomobil C SUV olacaq, 2030-cu ilə qədər cəmi 5 model və 3 "facelift" (makiyaj) reallaşacaq.