Əmək və Əhalinin Sosial Müdafiəsi Nazirliyində Kollegiya iclası keçirilib.

Nazir Sahil Babayev bildirib edib ki, bir tərəfdən əhalinin sosial müdafiəsinin gücləndirilməsi, sosial ödənişlərin, o cümlədən əmək haqqı, pensiya və müavinətlərin əhəmiyyətli dərəcədə artırılması üçün mühüm addımlar atılır. İmtiyazlı vətəndaşların mənzillə və avtomobillə təminatı da daxil olmaqla, mühüm sosial proqramlar xeyli genişləndirilir. Şəhid ailələrinə  və müharibə əlillərinə ötən il nəzərdə tutulduğundan 3 dəfə çox olmaqla 626 mənzil təqdim edilibsə, 2019-cu ildə bundan 50 faiz çox olmaqla  934 mənzil və fərdi evin verilməsi işləri aparılır.

S.Babayev bildirib ki, digər tərəfdən, əmək, məşğulluq, sosial müdafiə və sosial təminat sahələri üzrə əhaliyə xidmətlərin keyfiyyətinin müasir əsaslar üzərində yüksəldilməsi təmin olunur. Xüsusilə Birinci vitse-prezident, Heydər Əliyev Fondunun prezidenti Mehriban xanım Əliyevanın təşəbbüsü olan DOST  layihəsi bu vacib məqsədə nail olunmasına imkan verib. Bakıda və növbəti ildən etibarən regionlarda DOST mərkəzləri şəbəkəsi genişləndiriləcək.

Nazir prioritet fəaliyyət istiqaməti kimi reabilitasiya və sosial xidmət infrastrukturunun müasirləşdirilməsi və genişləndirilməsi işlərinin davam etdirildiyini deyib. Bu ay Yevlax və Naftalan şəhərlərində Əlilliyi olan şəxslər üçün  Regional Bərpa Mərkəzlərinin, Mərdəkan Müalicə Pansionatının əsaslı təmir və yenidənqurmadan sonra müasir avadanlıqlarla təchiz edilməklə istifadəyə verildiyini bildirib. Bu ilin sonuna qədər daha bir sıra sosial obyektlərin həssas qruplardan olan vətəndaşların istifadəsinə veriləcəyini, gələn il də bu istiqamətdə işlərin aparılacağını diqqətə çatdırıb.  

S.Babayev cari ilin 10 ayı ərzində  nazirliyin Bərpa Mərkəzləri tərəfindən  7241 nəfər əlilliyi olan şəxsə stasionar, 1867 nəfər əlilliyi olan şəxsə isə ambulator qaydada reabilitasiya xidmətləri göstərildiyini deyib. Bildirib ki, yeni reabilitasiya ocaqları istifadəyə verildikcə bu göstəricilər əhəmiyyətli dərəcədə yüksələcək.

Sosial xidmətlərin əhatə dairəsinin genişləndirildiyini qeyd edən S.Babayev bu sahədə göstərilən xidmətlərə, sosial xidmətçilərin fəaliyyətinə monitorinq və nəzarət sisteminin gücləndirilməsinin vacibliyini diqqətə çatdırıb. O, ümumilikdə sosial xidmətlərin keyfiyyətinin artırılması, bu sahədə fəaliyyət mexanizminin yenidən qurulmaqla təkmilləşdirilməsi üçün islahat tədbirlərinin zəruri olduğunu bildirib.

Nazir həmçinin qeyd edib ki, peşə reabilitasiyası tədbirləri də gücləndirilməli, Sağlamlıq imkanları məhdud gənclərin Peşə Reabilitasiyası Mərkəzinin imkanlarından daha səmərəli istifadə təmin edilməlidir.

İclasda Əmək və Əhalinin Sosial Müdafiəsi nazirinin müavini Vüsal Nəsirli nazirliyin sifarişi ilə sosial obyektlərin təmiri və tikintisi sahəsində aparılan işləri diqqətə çatdırıb. Nazirlik yanında Dövlət Sosial Müdafiə Fondunun şöbə müdiri Vüqar Behbudov həssas qruplardan olan vətəndaşlara göstərilən sosial xidmətlər, nazirlik yanında Dövlət Tibbi-Sosial Ekspertiza və Reabilitasiya Xidmətinin rəisi Cavid Abdul-Qədirov nazirliyin tabeliyindəki bərpa müəssisələrinin fəaliyyəti, nazirliyin Əmək siyasəti şöbəsinin müdiri Əbülfət Məhərrəmov bəzi sahələr üzrə qulluqçu vəzifələrinin Vahid Tarif-İxtisas Sorğu Kitabçalarında dəyişiklik edilməsi məsələləri barədə çıxış ediblər.

İclasda sosial obyektlərin tikintisi və təmiri, sosial xidmətlərin təşkili, əlilliyi olan şəxslərin tibbi və sosial reabilitasiyası sahələrində aparılan işlər ətraflı müzakirə olunub. Həmçinin bir sıra sahələr üzrə qulluqçu vəzifələrinin Vahid Tarif-İxtisas Sorğu Kitabçalarında dəyişiklik edilməsi qərara alınıb.