2019-cu ilin 9 ayı ərzində “Rabitəbank” ASC-nin müştərilərə verdiyi cəmi kreditlər 47 milyon 723 min manat artıb.

“Marja” Bankın rüblük hesabatına istinadən xəbər verir ki, müştərilərə verilmiş cəmi kreditlər ötən ilin sonunda 317 milyon 764 manat ikən Sentyabr ayının sonuda 365 milyon 487 min manata çatıb.

9 ay ərzində istehlak kreditləri 51 milyon 542 min manat artaraq 128 milyon 772 min manata yüksəlib. Bankın istehlak kreditləri portfeli ötən ilin sonunda 77 milyon 231 min manat təşkil etmişdi.

9 ay ərzində müştərilərə verilmiş biznes kreditləri 15 milyon 391 min manat azalaraq 171 milyon 988 min manata geriləyib. Bankın biznes kreditləri portfeli ötən ilin sonunda 187 milyon 378 min manat təşkil etmişdi.

2019-cu ilin yanvar-sentyabr dövründə daşınmaz əmlak kreditləri 4 milyon 337 min manat artaraq 30 milyon 978 min manata, diəgər kreditlər isə 7 milyon 235 min manat artaraq 29 milyon 412 min manata yüksəlib.

“Rabitəbank”ın mümkün zərərlər üçün yaradılan məqsədli ehtiyat xaric kredit portfeli (xalis kreditlər) 43 milyon 284 min manat artaraq 325 milyon 521 min manata çatıb. Ötən ilin sonunda bu məbləğ 282 milyon 238 min manat idi.

HƏMÇİNİN OXU: Azərbaycan bankının mənfəəti 16 dəfə artıb - MALİYYƏ VƏZİYYƏTİNİ AÇIQLADI

İSTEHLAK KREDİTLƏRİ NƏ ÜÇÜN ARTIR?

Azərbaycan Banklar Assosiasiyasının (ABA) sədri, "Rabitəbank"ın Müşahidə Şurasının Sədri Zakir Nuriyev hesab edir ki, istehlak kreditlərinin artmasının əsas səbəbi ölkə əhalisinin gəlirlilik səviyyəsinin artmasıdır:

"İndiki dövrdə isə əhalinin gəlirlərindəki, eləcə də iş yerlərindəki artım və bu kimi səbəblərdən mövcud kriteriyalara uyğun şəxslərin sayı, nəticə etibarı ilə istehlak kreditləri artmağa başlayıb. Burada sual yaranır ki, bir şəxsin gəliri artıbsa, o niyə kredit götürür? İnsanlar pul yığıb ev almaq əvəzində daha tez olduğu üçün ipoteka krediti əldə etməyə üstünlük verirlər və ya evlərini daha tez təmir etdirmək istəyir, yeni mebellərinə daha tez qovuşmaq niyyətindədirlər, daha uzun istirahəti üstün tuturlar və s. İstehlak krediti deyə bir məhsulun yaranmasının səbəbidə elə budur: gələcəkdəki mümkün istehlakı cari dövrdə reallaşdırmaq istəyi".

Zakir Nuriyev bildirmişidi ki, və müraciət edən müştərilər bank daxili qaydalara uyğun kredit məhsulları ilə təmin edilirlər:

“Biznes kreditləşməsi ölkə iqtisadiyyatı üçün olduqca vacibdir və daim nəzarətdə saxlanılması gözlənilən yanaşmadır. Doğrudur ki, ilin əvvəlindən ölkə iqtisadiyyatı üzrə bəzi biznes sahələrinin kreditləşməsində yüksək artım tempi müşahidə edilmir. Lakin bununla birlikdə, xüsusilə, prioritet hesab edilən kənd təsərrüfatı, emal, sənaye və istehsal istiqamətləri üzrə kreditləşmədə artım müşahidə edilir.

Artıq banklar daha çox prioritet hesab edilən sahələrin kreditləşməsinə fokuslanmağa başlayıblar. Lakin bu o demək deyildir ki, digər sahələrin kreditləşməsi artıq dayanıb. Banklar bu sahələri də maliyyələşdirməkdə davam edirlər və müraciət edən müştərilər bank daxili qaydalara uyğun kredit məhsulları ilə təmin edilirlər. Sadəcə devalvasiyalardan sonra kreditləşmədəki canlanma bəzi sahələrdə dövlət dəstəyi ilə daha tez müşahidə edildi. Müəyyən müddət sonra məcmu tələbdəki yüksəliş hesabına kreditləşmənin bütün sahələrdə artacağını gözləyirik”.