“Naxçıvanbank” ASC 2019-cu ilin 9 ayını 4 milyon 404 min manat xalis mənfəət ilə başa vurub. Müqayisə üçün qeyd edək ki, Bank 2018-ci ilin 9 ayını 4 milyon 431 min manat xalis mənfəət ilə bağlamışdı. Beləliklə, “Naxçıvanbank” ASC-nin xalis mənfəəti cüzi azalıb (27 min manat). Bankın biznes fəaliyyətinin nəticəsini daha dəqiq əks etdirən əməliyyat mənfəəti isə xərclərin artması ilə əlaqədar olaraq daha çox azalıb.

“Marja” Bankın rüblük hesabatına istinadən xəbər verir ki, 2019-cu ilin yanvar-sentyabr dövründə “Naxçıvanbank”ın cəmi gəlirləri 8 milyon 339 min manat, cəmi xərcləri 3 milyon 577 min manat təşkil edib. Nəticədə Bankın 4 milyon 762 min manat əməliyyat mənfəəti formalaşıb. Əməliyyat mənfəətindən 358 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayrılıb. Bank 9 ay ərzində mənfəət vergisi ödəmədiyindən 4 milyon 404 min manat xalis mənfəət əldə edib.

Ötən ilin yanvar-sentyabr dövründə “Naxçıvanbank”ın cəmi gəlirlər 7 milyon 782 min manat, cəmi xərcləri 2 milyon 808 min manat, gəlirlərdən xərclər çıxıldıqdan sonra əməliyyat mənfəəti 4 milyon 974 min manat təşkil etmişdi. “Naxçıvanbank”  əməliyyat mənfəətinin 543 min manatını ehtiyatlara ayırdığından ötən ilin 9 ayını 4 milyon 431 min manat xalis mənfəətlə başa vurmuşdu.

Göründüyü kimi, cəmi gəlirlərin 557 min manat artmasına qarşılıq cəmi xərclər 769 min manat artıb (Xərclər gəlirlərdən 212 min manat daha çox artıb). Nəticədə əməliyyat mənfəəti 212 min manat azalaraq 4 milyon 974 min manatdan 4 milyon 762 min manata geriləyib.

30 Sentyabr 2019-cu il tarixində “Naxçıvanbank” ın müştərilərə verdiyi cəmi kreditlər 84 milyon 695 min manat təşkil edib. Ötən ilin eyni tarixində bu məbləğ 68 milyon 391 min manat idi (16 milyon 304 min manat və ya 23,8% artım)

“Naxçıvanbank”ın cəmi aktivləri 200 milyon manat səviyyəsini aşaraq 209 milyon 361 min manata çatıb. 30 Sentyabr 2019-cu il tarixindı Bank 83 milyon 58 min manat cəmi kapitala malik olub.