Azərbaycanın aparıcı korporativ bankı PAŞA Bank, bu gün işinə başlayan SIBOS 2019 41-ci Beynəlxalq Bankçılıq Forumu və Maliyyə Sənayesi sərgisində iştirak edir.

Bu barədə "Marja"ya Bankdan bildirilib.

Hər il dünyanın ən böyük maliyyə qurumlarını, fintech təşkilatlarını, bank üçün proqram təminatı tərtibatçılarını, maliyyə sənayesi üçün avadanlıq tədarükçülərini, maliyyə sektorunun müstəqil ekspertlərini təmsil edən minlərlə nümayəndələri bir araya toplayan irimiqyaslı bank tədbiri bu il İngiltərənin London şəhərində keçirilir.

Bankın məlumatında qeyd edilib ki, SIBOS 2019 forumunun əsas mövzusu "Sıx-bağlantılı dünyada tərəqqi (Thriving in a hyper-connected world)" olacaq. Mövzu çərçivəsində mütəxəssislər rəqəmsal texnologiyaların istifadəsinə və məlumatların toplanmasına və təhlilinə əsaslanan işgüzar münasibətlərə kütləvi keçiddən qaynaqlanan müasir çağırışları və imkanları müzakirə edəcəklər. Ayrıca, Forumun mövzuya əsaslanan sessiyalarında 9000-dən çox maliyyə ekspertlərinin diqqəti bank əməliyyatları və ödənişləri üçün açıq ekosistemin yaradılması, müasir texnologiyanın tətbiqi və bazar nəzarəti arasında tarazlığın tapılması, müasir bankçılıqda kiber təhlükəsizliyi, ödəniş sistemlərinin transformasiyası kimi geniş spektrdə aktual problemlərin və qlobal maliyyə sənayesinin inkişafındakı müasir tendensiyaların müzakirəsinə yönəldiləcəkdir.

PAŞA Bankın İdarə Heyətinin Sədri Taleh Kazımovun sözlərinə görə, qlobal tərəqqi davamlı təcrübə və məlumat mübadiləsi ilə sıx əlaqədardır, buna görə də Bank son 10 il ərzində SIBOS Beynəlxalq Forumunda fəal iştirak edir.

“2018-ci ildən etibarən PAŞA Bank öz biznesinin rəqəmsal transformasiyasının və gündəlik fəaliyyətində rəqəmsal alətlərin geniş tətbiqinin keçid mərhələsinə başladı. Beləliklə, yaxın keçmişdə Azərbaycan bazarında hesab açmaq, əməkhaqqı kartlarını onlayn sifariş etmək imkanlarını təqdim etdik və müştərilərin ehtiyaclarına uyğun olaraq tamamilə yeni Onlayn Bankçılıq xidmətini hazırladıq. SIBOS kimi irimiqyaslı tədbirlərdə iştirak etmək nəinki dünya maliyyə qurumlarının ən yaxşı rəqəmsal həlləri, ən qabaqcıl təcrübə və praktikaları ilə tanış olmaq, həm də müştərilərimizin ehtiyaclarına uyğun olaraq onları Azərbaycanın bank bazarında tətbiq etmək və rəqəmsal transformasiyanın səbəb olduğu bu dəyişikliklərə müştərilərimizi tədricən hazırlamaq imkanı verir”, - deyə T. Kazımov vurğuladı.

Bu il tədbir 4 gün davam edəcək və sentyabrın 26-da öz işini başa çatdıracaq. Ümumdünya Banklararası Maliyyə Telekommunikasiyası Cəmiyyəti (SWIFT) tərəfindən təşkil edilən SIBOS Forumu və Sərgisi gələn il ABŞ-ın Boston şəhərində keçiriləcəkdir.