Azərbaycanda mənzil tikintisi sektorunda özbaşınalıqlar davam edir. Tikinti şirkətlərinə zəif nəzarət, tələblərin yetərsizliyi və cəzaların olmaması sui-istifadələrə şərait yaradır. Təəssüf ki, bir sıra məmurlar bu “bulanıq” sahədə “balıq tutmağa” çalışırlar.

“Marja”nın müxbiri yeni yaşayış binalarından mənzil alan sakinlər ilə söhbətləşib. Şikayətlərdən biri mənzillərin sahəsi ilə bağlıdır. Onlar iddia edirlər ki, yaşadıqları sahə müqavildə göstəriləndən çox azdır. “Sahə fırıldağı” ilə minlərlə manat pul  tikinti şirkətləri tərəfindən mənimsənilir.

Tikinti şirkətləri mənzillərin sahəsini hesablayan zaman çöldən öçmə aparırlar. Yəni, sahəyə çöl divarların,  arakəsmələrin, sütünların altında qalan və şaxtaların tutduğu sahələr “şişirdilərək” daxil edilir. Girintili-çıxıntılı  mənzillərdə sahəni dəqiq hesablamaq çətinləşir.   

Alıcılar bildirirlər ki, tikinti şirkətinin müqavilədə göstərdikləri sahə ilə razılaşmaqdan başqa seçimləri olmur. Sonradan mənzilinin sahəsini özü ölçənlərdən biri bildirdi ki, müqavilədə sahəsi təxminən 82 kvadrat metr olan mənzilin sahəsini təxminən 72 kvadrat metr olduğunu hesablayıb.

Mənzillərə çıxarış (kupça) alan zaman da çıxarışda göstərilən sahə müqavilədə göstərilən sahədən çox aşağı olur. Düzdür, çıxarış verilən zaman eyvanın sahəsi 0,3 əmsalına vurulduğundan mənzilin sahəsi müqavilədə göstəriləndən aşağı olmalıdır. Eyvanın 0,3 əmsalla hesablanmasına görə yaranan azalma nəzərə alınsa belə real sahə müqavilədə göstəriləndən çox az olur.

Şakinlər deyir ki, tikinti şirkəti çöl divarlara görə, qonşuların hamısından pul alır: "Qonşumla mənim aramdakı divara görə ikimiz də şirkətə "kvadrathaqqı" ödəyirik. Mənim sahəmi mənim divarımın çölündən, yəni qonşumun divarının içərisindən, onun sahəsini də mənim divarımın içərisindən, yəni onun divarının çölündən hesablayırlar. Nəticədə şirkət eyni kvadratı bütün qonşulara satmış olur".

Sakinlər bildirirlər ki, bu sahədə cəzalar müəyyən edilməlidir. Əgər mənzilin müqavilədə göstərilən sahəsi, Daşınmaz Əmlakın Dövlət Reyestri Xidmətinin tələbləri nəzərə alaraq hesabladığı sahədən çox olarsa tikinti şirkətinə və onun sahibinə qarşı cinayət işi açılmalıdır. Mənzilin sahəsində alıcını aldatmaq, sonra da olmayan bu sahəyə görə kommunal ödənişlər yığmaq cinayətdir.