Maliyyə Bazarlarına Nəzarət Palatasının açıqladığı məlumata görə, 31 iyul 2019-cu il tarixinə Azərbaycanda fəaliyyət göstərən bankların cəmi aktivləri 30 milyard 90 milyon manat, cəmi öhdəlikləri isə 25 milyard 507 milyon manat təşkil edib. Sektorun balans kapitalı 4 milyard 583 milyon manat olub.

Aktivlər

İyul ayına sektorun aktivlərinin 44.3%-ni kredit portfeli təşkil edir. Ay ərzində kredit portfeli 1.5% (196.2 milyon manat) artıb. Banklar üzrə ümumi kredit portfeli ayın sonuna 13 milyard 342.3 milyon manat təşkil edib. Ay ərzində milli valyutada kreditlər 2.5% (210.1 milyon manat) artaraq 8 milyard 650.7 milyon manata çatıb.

Öhdəliklər

2019-cu ilin iyul ayında fiziki şəxslərin əmanətləri 8 milyard 471.6 milyon manat təşkil edib. İyul ayında müddətli əmanətlər 0.4% (19.9 milyon manat) artaraq 5 milyard 357.4 milyon manat təşkil etmişdir. Artım milli valyutada olan əmanətlər (58.7  milyon manat, 2.5%) üzrə baş vermişdir.

Hüquqi şəxslərin cəmi depozitləri iyul ayında 3.7% (375.7 milyon manat) artaraq 10 milyard 573.2 milyon manata çatıb. Ay ərzində müddətli depozitlər 11.4% (257.6 milyon manat) artaraq 2 milyard 510.8 milyon manat təşkil etmişdir. Milli valyutada olan depozitlər 6.9% (274 milyon manat) artaraq 4, milyard 246.3 milyon manata, xarici valyutada olan müddətli depozitlər isə 12.3% (249.8  milyon manat) artaraq 2 milyard 285.5 milyon manata çatıb.

Balans kapitalı

Sektorun balans kapitalı iyul ayı ərzində 0.4% (16.7 milyon manat) azalaraq 4 milyard 583 milyon manat təşkil etmişdir.

Mənfəət və zərər

İyul ayında bankların əməliyyat mənfəəti 13.9% (57.7 milyon manat) artaraq 472.4 milyon manat, xalis mənfəəti isə 406.2 milyon manat təşkil edib. Ötən ilin müvafiq dövrü ilə müqayisədə faiz gəlirləri 10.7%, kreditlər üzrə faiz gəlirləri isə 14.2% artmışdır.

Ümumi məlumatlar

Fəaliyyət göstərən 30 bankın filiallarının sayı 514, şöbələrinin sayı 128, ATM-lərin sayı 2582 olub. Bank  sektorunun  işçi  heyətinin sayında artım iyul ayında da davam etmişdir. Belə ki, 2019-cu ilin iyul ayında işçi sayı 0.8% (146 nəfər) artaraq 18 min434  nəfər təşkil edib.

31 iyul 2019-cu il tarixinə bank sektorunun əsas göstəriciləri bank sektorunun icmal göstəricilərində öz əksini tapıb.