-Maliyyə Bazarlarına Nəzarət Palatasının dəstəyi ilə "Bank Respublika" və "İnnoland" bank sistemində fintexlərlə qarşılıqlı əlaqələrin genişləndirilməsi üzrə yeni layihəyə imza atır.

-Developerlər bank müştəriləri üçün müştəri yönümlü və onların ehtiyaclarını qarşılayan proqram və xidmətlər yarada biləcəklər.

Son illərdə ölkənin bank sektoru rəqəmsal transformasiyanın dərinləşməsi istiqamətində ardıcıl addımlar atır. Rəqəmsal transformasiya sürətləndikcə innovativ texnologiyaların realizasiyasının genişlənməsi, fintex-startaplar ilə qarşılıqlı əlaqələrin möhkəmlənməsi, bank müştəri münasibətlərinin rəqəmsal mühitdə qurulması mühüm əhəmiyyət kəsb edir.

Bu istiqamətdə, “Bank Respublika” ASC və  Azərbaycan Respublikasının Prezidenti  yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzi, Azərbaycan Respublikası Maliyyə Bazarlarına Nəzarət Palatasının dəstəyi ilə ölkədə ilk dəfə olaraq fintex-startup-lar üçün “Open Banking Lab” layihəsinə başlayır.

“Bank Respublika”dan "Marja"ya daxil olmuş məlumatda bildirilir ki, 16 həftə davam edəcək layihə çərçivəsində fintex-startapçılar fərdi və ya komanda şəklində öz ideyalarını təqdim edə biləcəklər. İlkin seçmə mərhələləsini keçən fintex-startuplar inkubasiya proqramında iştirak edərək qabaqcıl ekspertlərin iştirakı ilə təlim keçə biləcəklər. Eyni zamanda, fərqlənən iştirakçılara ölkədə ilk dəfə olaraq “Bank Respublika” ASC-nin maliyyə xidmətlərinə qoşulmaq üçün test rejimində olan Açıq API interfeysinə çıxış veriləcəkdir.

Açıq API (Open API) - müştərilərə bank xidmətlərini bankdankənar servislər, məsələn, ödəniş platformaları və ya onlayn kredit platformaları vasitəsilə əldə etmək imkanı verən bir mexanizmdir. Açıq API vasitəsilə developerlər bank müştəriləri üçün müştəri yönümlü və onların ehtiyaclarını qarşılayan proqram və xidmətlər yarada biləcəklər.

"Maliyyə Bazarlarına Nəzarət Palatasının dəstəyi ilə “Bank Respublika” ASC tərəfindən ölkədə ilk dəfə olaraq test rejimində Açıq API laiyhəsinin bu cür təqdim edilməsi banklarla fintexlər arasında qarşılıqlı əməkdaşlığın möhkəmlənməsi, qabaqcıl beynəlxalq təcrübənin ölkəmizdə tətbiqi imkanlarının qiymətləndirilməsi baxımından mühüm əhəmiyyət kəsb edir"- məlumatda deyilir.

Mövzu ilə əlaqədar "Bank Respublika" ASC-nin İdarə Heyəti sədrinin müavini Elnur Həsənov və “INNOLAND” İnkubasiya və Akselerasiya Mərkəzinin Direktoru Məmməd Kərim "Marja"ya açıqlama verib 

“İlk növbədə layihənin həyata keçirilməsində göstərdikləri dəstəyə görə Maliyyə Bazarlarına Nəzarət Palatasına və INNOLAND İnkubasiya və Akselerasiya Mərkəzinə təşəkkürümü bildirmək istərdim. Bank Respublika universal rəqəmsal bankın yaradılması strategiyasını ardıcıl olaraq həyata keçirir. Açıq APİ-yə əsaslanan inkubasiya proqramının innovativ layihəsini işə salmaqla, ölkədə ilk dəfə olaraq ideyalar, həllər və qarşılıqlı əlaqə üçün test mühiti yaradırıq. Əminəm ki, fintex-şirkətləri ilə əməkdaşlıq imkanlarımızı həyata keçirməyə kömək edəcək və ölkədə bank sektorunun rəqəmsal transformasiyasına təkan verəcəkdir ", deyə Bank Respublikanın İdarə Heyəti sədrinin müavini Elnur Həsənov bildirdi.

“İnnoland ölkədə innovasiya təşəbbüslərinin bir araya gəldiyi rəqamsal və fiziki platformadır. Bu platformada bugünə qədər bir sıra mövzularda proqramlar həyata keçirmişik. Həmişə qeyd etdiyim kimi, bu proqramların ən ölçülə bilən və tez nəticəsini görmək imkanı olan sektorlar maliyyə və telekomdur. Çox xoş haldır ki, bugün biz Maliyyə texnologiylarının inkişafını nəzərdə tutmuş bir proqramın startın veririk. Bank Respublikanın bu mövzuda öncüllük etməsi və ciddi dəstəyi düşünürəm ki, qeyd olunan proqramı uzun ömürlü və faydalı edəcək”, -Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzinin Direktoru Məmməd Kərim bildirdi.