Dövlət Turizm Agentliyinin yaydığı məlumata görə, 2019-cu ilin iyul ayında Azərbaycana 365 min əcnəbi qonaq səfər edib ki, bu da 2018-ci ilin iyul ayına nisbətdə 10.6% artım deməkdir.

"Marja" məlumata istinadən xəbər verir ki, qonaqların üçdə birindən çoxunu 35%-lə Rusiyadan gələnlər təşkil edib. 2018-ci ilin eyni ayı ilə müqayisədə Rusiyadan 11 min və ya 10% çox qonaq gəlib.

İyul ayı üzrə ən böyük artım Gürcüstandan gələnlər arasında müşahidə olunub, belə ki, ötən ilin eyni ayı ilə müqayisədə 12 min və ya 26% daha çox xarici vətəndaş gəlib. Bununla da iyul ayında Gürcüstandan gələnlərin sayı 61 min nəfər təşkil edib.

Yaxın Şərq ölkələrindən gələnlərin sayı 7 min və ya 10% azalaraq 60 minə çatıb. Qeyd edək ki, Səudiyyə Ərəbistanından səyahət edənlərin sayı 25% artaraq rekord həddə - 29 minə çatıb.

İraq, BƏƏ, Oman və Küveyt kimi Yaxın Şərqin digər ölkələrində azalma müşahidə olunub. Türkiyə, İran, Mərkəzi Asiya və Cənubi Asiyadan 29, 21, 14 və 12 min nəfər gəlib, artım müvafiq olaraq 6%, 10%, 41% və 25% təşkil edib. Son aylarda olduğu kimi Hindistan (7 min; 81% artım) və Pakistan (5 min; 13% azalma) Cənubi Asiyanın, Qazaxıstan (6 min; 26% artım) və Türkmənistan (6 min; 68% artım) isə Mərkəzi Asiyanın əsas turizm bazarlarıdır.

Cari ilin yanvar-iyul aylarında Azərbaycanı 1.8 milyon xarici səyahətçi ziyarət edib ki, bu da 2018-ci ilin ilk yeddi ayı ilə müqayisədə 122 min və ya 7.4% çoxdur.

Ən böyük artım 76 min və ya 23% daha çox xarici qonaqla Gürcüstandan gələnlərin sayında müşahidə olunub.

Mərkəzi və Cənubi Asiyadan gələn səyahətçilərdə də müvafiq olaraq 39% və 44% artım qeydə alınıb. Ən yaxşı turistik bazarlar sayılan Rusiya və Türkiyədən gələnlərin sayı 4% artıb. Yanvar-iyul dövrü ərzində bu ölkələrdən gələnlərin sayı müvafiq olaraq 542 və 176 min təşkil edib.

Mərkəzi və Cənubi Asiya regionlarının inkişaf etməkdə olan bazarlarında - Türkmənistan və Hindistanda da böyük həcmdə artım mövcuddur. Belə ki, bu ölkələr üzrə artım müvafiq olaraq 81 və 80% qeydə alınıb və ilk yeddi ay ərzində gələnlərin sayı 27 və 33 minə çatıb.

İrandan gələnlərin sayı 23% azalaraq 127 min, Yaxın Şərqdən gələnlərin sayı isə 6% azalaraq 205 min olub.

Qeyd etmək lazımdır ki, yanvar-iyul dövrü ərzində Azərbaycan turizmi üçün ənənəvi xarakter daşımayan Qərbi Avropa ölkələrindən gələnlərin sayı 14 min və ya 25% artaraq 73 min təşkil edib.