“Günay Bank” ASC 2019-cu ilin 1-ci yarısını 752 min manat xalis mənfəət ilə başa vurub. Bu, ötən ilin eyni dövrü ilə müqayisədə 135 min manat və ya 21,9% çoxdur. “Günay Bank” ASC 2018-ci ilin 1-ci yarısını 617 min manat xalis mənfəətlə bağlamışdı.

“Marja” Bankın rüblük hesabtalarına istinadən xəbər verir ki, cari ilin yanvar-iyun dövründə “Günay Bank”ın cəmi gəlirləri 9 milyon 424 min manat, cəmi xərcləri isə 8 milyon 820 min manat təşkil edib. Nəticədə Bankın 604 min manat əməliyyat mənfəəti yaranıb. Eyni zamanda aktivlər üzrə mümkün zərərlərin ödənilməsi üçün yaradılmış xüsusi ehtiyatdan 148 min manat azad olub və mənfəət 752 min manata yüksəlib.

Müqayisə üçün qeyd edək ki, 2018-ci ilin yanvar-iyun dövründə “Günay Bank”ın cəmi gəlirləri 9 milyon 133 min manat, cəmi xərcləri 5 milyon 217 min manat, əməliyyat mənfəəti 3 milyon 916 min manat təşkil etmişdi. Bank əməliyyat mənfəətinin 3 milyon 299 min manatı aktivlər üzrə (ehtimal olunan kredit və depozit itkiləri üzrə ) mümkün zərərlərin ödənilməsi üçün xüsusi ehtiyatın yaradılmasına ayrıldığından həmin dövrü 617 min manat xalis mənfəətlə bağlamışdı.

FAİZ GƏLİRLƏRİ ARTIB

2018-ci ilin 1-ci yarısı ilə müqayisədə 2019-cu ilin 1-ci yarısında “Günay Bank”ın faiz gəlirləri 35% artaraq 5 milyon 815 min manata yüksəlib. Qeyri-faiz gəlirləri isə 25% azalaraq 3 milyon 608 min manata düşüb.

XƏRCLƏRİ DAHA ÇOX ARTIB

2018-ci ilin 1-ci yarısı ilə müqayisədə 2019-cu ilin 1-ci yarısında “Günay Bank”ın faiz xərcləri 2 dəfə artaraq 4 milyon 316 min manata, qeyri-faiz xərcləri isə 24% artaraq 3 milyon 852 min manata yüksəlib.

BANK BÖYÜYÜB, MÜŞTƏRİLƏRƏ VERİLƏN KREDİTLƏR ARTIB

30 İyun 2019-cu il tarixində “Günay Bank” ASC 224 milyon 249 min manat cəmi aktivlərə, 161 milyon 272 min manat cəmi öhdəliklərə və 62 milyon 976 min manat cəmi balans kapitalına malik olub.

30 İyun 2018-ci il tarixində “Günay Bank” ASC 181 milyon 695 min manat cəmi aktivlərə, 120 milyon 970 min manat cəmi öhdəliklərə və 60 milyon 725 min manat cəmi balans kapitalına malik idi. Son 12 ay ərzində Bankın cəmi aktivləri 42 milyon 553 min manat artıb.

Aktivlərdəki artımın səbəblərindən biri müştərilərə verilən kreditlərin artmasıdır. Ötən ilin İyun ayının sonunda müştərilərə verilmiş cəmi kreditlər 147 milyon 734 min manat ikən, cari ilin İyun ayının sonunda 151 milyon 586 min manata çatıb.

2018-ci ilin 1-ci yarısı ilə müqayisədə “Günay Bank”da depozitlər (banklar və digər maliyyə institutları istisna olmaqla)  6 milyon 527 min manat və ya 7,5% artaraq 93 milyon 426 min manata yüksəlib. Bankların və digər maliyyə institutların depozitləri isə 4,3 dəfə artaraq 22 milyon 380 min manata qalxıb.