“PAŞA Bank” ASC 2019-cu ilin 1-ci yarısını (yanvar-iyun dövrünü) 51 milyon 703 min manat xalis mənfəət ilə başa vurub. Müqayisə üçün qeyd edək ki, Bank 2018-ci ilin 1-ci yarısını 22 milyon 162 min manat xalis mənfəət ilə bağlamışdı. Beləliklə, “PAŞA Bank”ın xalis mənfəəti 2,3 dəfə artıb.

“PAŞA Bank” 2017-ci ilin 1-ci yarısını 13 milyon 531 min manat xalis mənfəətlə bağlamışdı.

“Marja” Bankın rüblük maliyyə hesabatlarına istinadən xəbər verir ki, ötən ilin ilk 6 ayında 80 milyon 769 min manat təşkil etmiş faiz gəlirləri cari ilin ilk 6 ayında 100 milyon 265 min manata yüksəlib (19 milyon 496 min manat və ya 24,1% artıb).

“PAŞA Bank”ın qeyri-faiz gəlirləri isə ötən ilin ilk 6 ayında 13 milyon162 min manat ikən, bu ilin ilk 6 ayında 21 milyon 340 min manat təşkil edib (8 milyon 178 min manat və ya 62,1% artıb).

2019-cu ilin 1-ci yarısında “PAŞA Bank”ın cəmi gəlirləri 121 milyon 605 min manat, cəmi xərcləri isə 70 milyon 238 min manat təşkil edib. Xərclər xaric bankın 51 milyon 368 min manat  mənfəət vergisi xərcindən əvvəl mənfəəti formalaşıb. Bank 335 min manat mənfəət vergisi ödəyib. Nəticədə Bank cari ilin birinci yarısını 51 milyon 703 min manat xalis mənfəət ilə bağlayıb.

2018-ci ilin yanvar-iyun dövründə PAŞA Bankın cəmi gəlirləri 93 milyon 931 min manat, o cümlədən faiz gəlirləri 80 milyon 769 min manat, qeyri-faiz gəlirləri 13 milyon 162 min manat  təşkil etmişdi.

AKTİVLƏRİ YARIM MİLYARD MANATDAN ÇOX ARTIB

30 İyun 2019-cu il tarixində “PAŞA Bank” 4 milyard 430 milyon 357 min manat cəmi aktivlərə malik olub. Ötən ilin eyni tarixində Bankın cəmi aktivləri 3 milyard 901 milyon 761 min manat təşkil etmişdi. Beləliklə, 12 aylıq dövrdə “PAŞA Bank”ən cəmi aktivləri 528 milyon 596 min manat və ya 13,5% artıb.

Müştərilərə verilən kreditlər isə 364 milyon 878 min manat və ya 35,2% artaraq 1 milyard 402 milyon 114 min manata çatıb.

“PAŞA Bank”ın müştərilər qarşısında öhdəlikləri isə ötən ilin 30 İyun tarixindəki 3 milyard 253 milyon 678 min manatdan 3 milyard 626 milyon 765 min manata yüksəlib (373 milyon 87 min manat çox).

30 İyun 2019-cu il tarixində “PAŞA Bank” 363 milyon 358 min manat cəmi balans kapitalına malik olub.