“Bank Respublika” 2018-ci ildə zərərdən mənfəətə keçib, böyüyüb, kapitalını, müştərilərə verilən kreditləri və gəlirini artırıb.

“Bank Respublika” ASC 2018-ci ili 2 milyon 154 min manat xalis mənfəət ilə başa vurub. Halbuki, Bank 2017-ci ili 10 milyon 518 min manat zərər ilə bağlamışdı.

“Marja” Bankın maliyyə göstəricilərinə istinadən xəbər verir ki, 2017-ci illə müqayisədə 2018-ci ildə “Bank Respublika”nın cəmi gəlirləri 8 milyon 982 min manat və ya 15% artaraq 69 milyon 57 min manat təşkil edib. Bank 2017-ci ildə 60 milyon 75 min manat cəmi gəlir əldə etmişdi.

İllik müqayisədə Bankın faiz gəlirləri 11 milyon 794 min manat və ya 38,5% artaraq 42 milyon 460 min manata qalxıb, qeyri-faiz gəlirləri isə 10,6% azalaraq 26 milyon 597 min manata düşüb. “Bank Respublika” 2017-ci ildə 30 milyon 666 min manat faiz, 29 milyon 409 min manat qeyri-faiz gəliri əldə etmişdi.

FAİZ XƏRCLƏRİ AZALIB

Ötən il, “Bank Respublika”nın cəmi xərcləri 59 milyon 896 min manat, o cümlədən faiz xərcləri 17 milyon 839 min manat, qeyri-faiz xərcləri 42 milyon 57 min manat təşkil edib. 2017-ci ildə Bankın cəmi xərcləri 55 milyon  112 min manat, o cümlədən faiz xərcləri 22 milyon 425 min manat, qeyri-faiz xərcləri 32 milyon 687 min manat təşkil etmişdi.

Ötən il “Bank Respublika” ASC 69 milyon 57 min manat cəmi gəliri əldə etmək üçün 59 milyon 896 min manat xərc çəkib. Nəticədə Bankın 9 milyon 161 min manat əməliyyat mənfəəti qalıb. Əməliyyat mənfəətinin 7 milyon 7 min manatı ehtimal olunan depozit və kredit itkiləri üçün yaradılan ehtiyata ayrılıb. Beləliklə, Bank ötən ili 2 milyon 154 min manat xalis mənfəət ilə bağlayıb.

“Bank Respublika” 2017-ci ildə 4 milyon 963 min manat əməliyyat mənfəəti əldə etmiş, ehtiyatlara 15 milyon 481min manat ayırdığından həmin ili 10 milyon 518 min manat zərər ilə başa vurmuşdu. Ehtiyatlara ayırmanın azalması kredit riskinin və problemli kreditlərin azaldığına işarədir. 

Ötən il həm əməliyyat mənfəəti artdığından, həm də ehtiyatlara ayırma azaldığından “Bank Respublika” ASC zərərdən mənfəətə keçib.

BANK BÖYÜYÜB

“Bank Respublika”nın aktivləri 1 milyard manata yaxınlaşıb. 31 Dekabr 2018-ci il tarixində Bankın cəmi aktivləri 983 milyon 98 min manat təşkil edib, bu 2017-ci ilin sonu ilə müqayisədə 280 milyon 984 min manat və ya 40% çoxdur. İllik müqayisədə müştərilərə verilən kreditlər və lizinqlər 229 milyon 614 min manatdan 343 milyon 630 min manata yüksəlib (114 milyon 16 min manat və ya 49,6% artım).

MƏCMU KAPİTALI MİNİMAL TƏLƏBDƏN YÜKSƏKDİR

31 Dekabr 2018-ci il tarixində “Bank Respublika” 58 milyon 444 min manat məcmu kapitala malik olub. 2017-ci ilin sonunda bu rəqəm 26 milyon 678 min manat idi. Qeyd edək ki, banklara qarşı minimal məcmu kapital tələbi 50 milyon manatdır.