“PAŞA Bank” ASC 2018-ci ilin 9 ayını 50 milyon 429 min manat xalis mənfəət ilə başa vurub. Müqayisə üçün qeyd edək ki, “PAŞA Bank” ASC 2017-ci ilin 9 ayını 29 milyon 70 min manat xalis mənfəətlə bağlamışdı. Beləliklə, Bankın qazancı 73,5% artıb.

“PAŞA Bank” 2018-ci ilin 1-ci rübündə 6 milyon 532 min manat, 2-ci rübündə 15 milyon 630 min manat, 3-cü rübündə isə 28 milyon 267 min manat xalis mənfəət əldə edib.

FAİZ GƏLİRLƏRİ ARTIB, QEYRİ-FAİZ GƏLİRLƏRİ AZALIB

“Marja” Bankın maliyyə hesabatlarına istinadən xəbər verir ki, cari ilin yanvar-sentyabr dövründə “PAŞA Bank”ın cəmi gəlirləri 146 milyon 615 min manat, o cümlədən faiz gəlirləri 124 milyon 263 min  manat, qeyri-faiz gəlirləri 22 milyon 352 min manat təşkil edib.

2017-ci ilin yanvar-sentyabr dövründə Bankın cəmi gəlirləri 161 milyon 91 min manat, o cümlədən faiz gəlirləri 122 milyon 559 min manat, qeyri-faiz gəlirləri 38 milyon 532 min manat təşkil etmişdi. Qeyri-faiz gəlirlərinin azalması xarici valyuta ilə əməliyyatlardan gəlirlərin 27 milyon 978 min manatdan 11 milyon 483 min manata düşməsidir. Manatın məzənnəsi sabitləşdiyindən spredlər də azalıb və bu azalma bankların gəlirlərinə mənfi təsitr göstərib.

ƏMƏLİYYAT MƏNFƏƏTİ ARTIB

“PAŞA Bank” cari ilin 9 ayında 146 milyon 615 min manat gəlirə qarşı 94 milyon 887 min manat xərcləyib.  Bank cari ilin 51 milyon 728 min manat əməliyyat mənfəətindən 1 milyon 299 min manat mənfəət vergisi ödəyib.

2017-ci ilin 9 ayında "PAŞA Bank" 161 milyon 91 min manat gəlirə qarşı 128 milyon 358 manat xərcləmiş, 32 milyon 732 min manat əməliyyat mənfəətindən 3 milyon 662 min manat mənfəət vergisi ödəmişdi. ÖTən ilin 9 ayı ilə müqayisədə cari ilin 9 ayında xərclərin azalması ehtiyatlara ayırmanın və faiz xərclərinin aşağı düşməsi ilə bağlıdır. 

AKTİVLƏRİ 4 MİLYARD MNATDAN ÇOXDUR

30 Sentyabr 2018-ci il tarixində PAŞA Bank 4 milyard 332 milyon 10 min  manat cəmi aktivlərə, 3 milyard 940 milyon 565 min manat cəmi öhdəliklərə və 391 milyon 445 min manat cəmi balans kapitalına malik olub.

30 Sentyabr 2017-ci il tarixində PAŞA Bank 3 milyard 457 milyon 155 min manat cəmi aktivlərə, 3 milyard 84 milyon 370 min manat cəmi öhdəliklərə və 372 milyon 785 min manat cəmi balans kapitalına malik olub.

MÜŞTƏRİLƏRƏ VERİLƏN KREDİTLƏR ARTIB

Müştərilərə verilən kreditlər ötən ilin Sentyabr ayının sonundakı 903 milyon 571 milyon manatdan 30 Sentyabr 2018-ci il tarixində 1 milyard 144 milyon 269 milyon manata yüksəlib. Bankın kredit portfeli təxminən 27% artıb.Müştərilərə verilmiş kreditlərin 111 milyon 970 min manatının və ya 9,2%-nin ödəmə vaxtı keçib.

30 Sentyabr 2018-ci il tarixində "PAŞA Bank" 269 milyon 281 min manat məcmu kapitala malik olub.