“Bank Respublika” ASC 2018-ci ilin birinci yarısını 638 min manat xalis mənfəətlə başa vurub. Halbuki Bank,  2017-ci ilin birinci yarısını 583 min manat zərər ilə bağlamışdı.

“Marja” Bankın maliyyə hesabatlarına istinadən xəbər verir ki, “Bank Respublika”nın faiz gəlirləri 2018-ci ilin birinci yarısında 2017-ci ilin eyni dövrü ilə müqayisədə 11,7% artaraq 17 milyon 767 min manat təşkil edib. Bank 2017-ci ilin birinci yarısında 15 milyon 903 min manat faiz gəliri əldə etmişdi. Bankın qeyri-faiz gəlirləri isə 28% azalaraq 11 milyon 469 min manat olub.  “Bank Respublika” 2017-ci ilin birinci yarısında 15 milyon 948 min manat qeyri-faiz gəlirlkəri əldə etmişdi.

GƏLİRLƏRİ XƏRCLƏRİNİ ARTIQLAMASI İLƏ BAĞLAYIR

Cəmi xərclər gəlirlərdən çıxıldıqdan sonra Bankın 2 milyon 809 min manat əməliyyat mənfəəti yaranıb. Ötən ilin birinci yarısında Bankın əməliyyat mənfəəti  4 milyon 759 min manat təşkil etmişdi.

EHTİYATLARA AYIRMALAR AZALIB

“Bank Respublika” 2018-ci ilin birinci yarısında aktivlər üzrə mümkün zərərlərin ödənilməsi üçün xüsusi ehtiyatın yaradılmasına 2 milyon 171 min manat da ayırıb. Nəticədə Bankın mənfəəti 638 min manata düşüb. Müqayisə üçün qeyd edək ki, Bank 2017-ci ilin birinci yarısında ehtiyatlara 5 milyon 342 min manat ayırmışdı.

MÜŞTƏRİLƏRƏ VERİLƏN KREDİTLƏR ARTIB

“Bank Respublika”nın müştərilərə verdiyi kreditlər 2018-ci ilin birinci yarısında 2017-ci ilin eyni dövrü ilə müqayisədə 14,4% artaraq 280 milyon 631 min manata çatıb. Son bir ildə Bankın aktivləri isə 779 milyon 396 min manatdan 858 milyon 777 min manata qalxıb.

ŞİRKƏTLƏRİN DEPOZİTLƏRİ ARTIB

“Bank Respublika”da hüquqi şəxslərin depozitləri 2018-ci ilin birinci yarısında 2017-ci ilin eyni dövrü ilə müqayisədə  52,2% artaraq 416 milyon 191 min manata çatıb. 30 İyun 2017-ci il tarixində hüquqi şəxslərin depozitləri   273 milyon 432 min manat idi. Fiziki şəxslərin depozitləri isə 0,6% azalaraq 195 milyon 833 min manata düşüb. 

YENİ STRATEGİYA HƏYATA KEÇİRİR

“2018-ci ilin ikinci rübünün yekunları üzrə əldə etdiyimiz pozitiv göstəricilər – təsdiq etdiyimiz inkişaf strategiyasının mərhələli şəkildə həyata keçirilməsinin nəticəsidir. Bu nəticələr müştərilərimizin maliyyə ehtiyaclarını maksimal şəkildə təmin etməyə və biznesi maliyyələşdirən aparıcı təşkilat kimi Bankın bazardakı mövqeyini möhkəmləndirməyə imkan verəcək” – deyə “Bank Respublika”nın İdarə Heyətinin sədri Asəf Namazov qeyd edib.