Devalvasiyalardan sonra yalnız zərər açıqlayan “AG Bank” mənfəətə çıxa bilmir. Halbuki, əksər banklar ötən ildən mənfəətə çıxmağı bacarıblar. “AG Bank”ın gəlirləri xərclərini ödəmir, problemli kreditlərin artması dayanmır, məcmu kapitalı “əriyir”. Qısası, Bank düşdüyü "bataqlıqdan" çıxa bilmir. 

“AG Bank” ASC 2018-ci ilin birinci yarısını 5 milyon 139 min manat xalis zərər ilə başa vurub. Müqayisə üçün qeyd edək ki, Bank 2017-ci ilin birinci yarısını 1 milyon 575 min manat xalis zərər ilə bağlamışdı. Beləliklə, Bankın zərəri 3 dəfədən çox artıb.

GƏLİRLƏRİ AZALIR, XƏRCLƏRİNİ ÖDƏMİR

“Marja” Bankın maliyyə hesabatlarına istinadən xəbər verir ki, illik müqayisədə Bankın faiz gəlirləri 12 milyon 280 min manatdan 9 milyon 675 min manata, qeyri-faiz gəlirləri isə 15 milyon 152 min manatdan 14 milyon 99 min manata düşüb.

1 GÜNƏ KREDİT ALIN!

Cari ilin yanvar-iyun dövründəki 23 milyon 774 min manat cəmi gəlirlərə qarşı, cəmi xərclər 26 milyon 829 min manat təşkil edib və nəticədə xərclər gəlirləri üstələdiyindən 3 milyon 55 min manat əməliyyat zərəri yaranıb.

Bundan başqa “AG Bank” aktivlər üzrə mümkün zərərlərin ödənilməsi üçün xüsusi ehtiyatın yaradılmasına 1 milyon 923 min manat da ayırıb. Beləliklə, Bankın zərəri 5 milyon 139 min manata yüksəlib. Ehtiyatlara ayırmaların artması, bankın daha çox kreditlərinin bata biləcəyi ehtimalı ilə əlaqədardır.

KREDİTLƏR AZALIR

30 İyun 2018-ci il tarixində “AG Bank” 487 milyon 790 min manat cəmi aktivlərə malik olub. Ötən ilin sonunda bu rəqəm 488 milyon 403 min manat idi. İlin birinci yarısında müştərilərə verilən kreditlər 7,3% azalaraq 282 milyon 907 min manatdan 263 milyon 612 min manata geriləyib.

KAPİTALI MİNİMAL TƏLƏBDƏN AŞAĞIDIR

Zərər ilə əlaqədar olaraq Bankın cəmi kapitalı 47 milyon 174 min manatdan 43 milyon 195 min manatab düşüb.

30 İyun 2018-ci il tarixində “AG Bank” 41 milyon 486 min manat məcmu kapitala malik olub. Bu da 50 milyon manat olan minimal tələbdən aşağıdır.