Almaniyanın avtomobil sənayesində dərinləşən böhran lüks seqmentin ən gəlirli markalarından biri olan Porsche-yə də ciddi zərbə vurub.

Marja xəbər verir ki, Şirkətin açıqlamasında yanvar-iyun aylarını əhatə edən dövrdə satışın bütün regionlarda azaldığı bildirilib. Markanın ən böyük bazarlarından olan Şimali Amerikada satışlar 13 faiz geriləyib, Çin bazarında isə azalmanın 32 faiz kimi kəskin səviyyəyə çatması narahatlıq yaradıb.

Porsche-nin rəhbərliyi qlobal azalmanın əsas səbəbləri sırasında daxiliyanma mühərrikinə malik 718 modelinin istehsalının dayandırılmasını, ötən il tam elektrikli Macan modelinə yüksək tələbin yaratdığı baza effektini və ABŞ-da elektrikli və hibrid avtomobillərə tətbiq edilən vergi təşviqlərinin başa çatmasını göstərib.

Bu məlumatdan sonra Frankfurt birjasında ticarət olunan şirkət səhmləri 1.3 faizə qədər dəyər itirib.

Ferrari-də uzun illər istehsalat üzrə rəhbər vəzifələrdə çalışdıqdan sonra yanvar ayında Porsche-nin "sükanı" arxasına keçən yeni Baş icraçı direktor Michael Leiters elektrikli avtomobil strategiyasındakı çətinliklər səbəbindən şirkət səhmlərinin Almaniyanın əsas fond indeksi DAX-dan çıxarılması ilə nəticələnən bu ağır prosesi geri çevirməyə çalışır.

Porsche ABŞ bazarında yerli zavoda malik olmadığı üçün ABŞ Prezidenti Donald Trampın idxal rüsumlarından ən çox zərər görən istehsalçılardan biri olub.

Gəlirliliyi bərpa etmək üçün radikal addımlar atan Leiters Volkswagen AG-nin tərkibində fəaliyyət göstərən şirkətin yenilənməsi məqsədilə aprel ayında Bugatti markası ilə bağlı ortaq müəssisədəki Porsche payını satmağa razılaşıb. Rəhbərlik diqqəti əsas istiqamətlərə yönəltmək və gəlirliliyi dəstəkləmək üçün qarşıdakı dövrdə yeni aktiv satışlarının da gündəmdə ola biləcəyinə işarə edir.

Almaniyanın avtomobil nəhənglərində ümumi geriləmə

Porsche-nin üzləşdiyi bu çətinlik əslində Almaniyanın lüks avtomobil istehsalçılarını bütövlükdə sarsıdan daha genişmiqyaslı yavaşlamanın bir hissəsidir. Həftə ərzində, çərşənbə günü açıqlama yayan Mercedes-Benz Group AG Çində daşınmaz əmlak böhranı və yerli istehsalçılarla rəqabətin sərtləşməsi səbəbindən ikinci rüb satışının 8 faiz azaldığını, bu ölkədəki geriləmənin isə 30 faizə çatdığını bildirib.

Digər nəhəng istehsalçı BMW AG isə ötən ay etdiyi xəbərdarlıqlarda Çində zəif tələb mühiti səbəbindən mənfəət marjasının 1 faiz kimi kritik səviyyəyə qədər enə biləcəyi barədə investorlarını xəbərdar etmişdi.

Ənənəvi olaraq Volkswagen qrupunda ən yüksək pul axını yaradan və kütləvi bazara yönəlmiş markaların aşağı gəlirliliyini kompensasiya edən Porsche-dəki bu maliyyə geriləməsi VW-nin Baş icraçı direktoru Oliver Blume üzərində təzyiqi də maksimum həddə çatdırıb.

Blume-nin Avropanın ən böyük avtomobil istehsalçısı üçün hazırladığı genişmiqyaslı yenilənmə planı cümə axşamı Wolfsburqda keçiriləcək müşahidə şurasının iclasında qızğın müzakirə olunacaq. İstehsalın azaldılacağı dövrə hazırlaşan Porsche-də CEO Leiters 2029-cu ilə qədər təxminən 3 min 900 iş yerinin ixtisarını nəzərdə tutan mövcud qənaət planlarına əlavə olaraq yeni xərc azaltma tədbirləri üzrə son danışıqların aparıldığını bildirib.

Şirkətin satış və marketinq üzrə İdarə Heyətinin üzvü Matthias Becker isə payızda keçiriləcək Kapital Bazarları Günü çərçivəsində “Strategiya 2035” planının yeni detallarını ictimaiyyətə açıqlayacaqlarını bildirib.