Çinin yeni enerji avtomobilləri sahəsində aparıcı brendlərindən biri olan BYD Azərbaycanda rəsmi fəaliyyətə başlayıb. Brendin təqdimat mərasimi Bakıda, Heydər Əliyev Mərkəzində keçirilib. Təqdimat BYD-nin Azərbaycanda rəsmi dilerləri "Group Motors" və "Sarda Auto" şirkətləri tərəfindən təşkil edilmişdi. 

Marja.az-ın məlumatına görə, BYD-nin Mərkəzi Asiya və Qafqaz üzrə Satışdan Sonrakı Xidmət Direktoru Çarli Çen isə Azərbaycanda satış və satış sonrası xidmət ekosisteminin qurulması barədə məlumat verib. Onun sözlərinə görə, müştəri etimadı yalnız avtomobilin texnologiyası və keyfiyyəti ilə deyil, həm də peşəkar servis və uzunmüddətli dəstək sistemi ilə formalaşır.

"Müştərilər üçün etibar yalnız texnologiya və məhsul keyfiyyəti ilə formalaşmır. Etibar həm də güclü, təhlükəsiz və dayanıqlı satış sonrası xidmət sistemi ilə möhkəmlənir. Bu gün mən BYD-nin Azərbaycanda etibarlı və uzunmüddətli xidmət ekosistemini necə qurduğunu sizinlə bölüşmək istəyirəm.

BYD üçün əsas öhdəliklərdən biri müştərilərə yüksək keyfiyyətli xidmət göstərməkdir. Biz inanırıq ki, güclü brend yalnız yaxşı avtomobillərlə deyil, həm də müştərinin bütün istifadə dövrü boyunca yanında olan peşəkar xidmət infrastrukturu ilə formalaşır.

Bu istiqamətdə ilk mühüm addım BYD-nin rəsmi satış və xidmət şəbəkəsinin yaradılmasıdır. İlk rəsmi BYD şourumu şirkətin qlobal xidmət standartlarına uyğun şəkildə fəaliyyət göstərəcək. Bu məkan müştərilərə müasir, rahat və brendin ruhunu əks etdirən təcrübə təqdim edəcək. Əlverişli yerləşməsi sayəsində Azərbaycandan və ətraf bölgələrdən olan müştərilər BYD avtomobilləri ilə yaxından tanış ola, test yürüşü edə və avtomobilləri rahat şəkildə əldə edə biləcəklər.

İkinci rəsmi diler mərkəzi isə hazırda inkişaf mərhələsindədir və yaxın zamanda istifadəyə veriləcək. Bu yeni flaqman şourum müasir müştəri təcrübəsi mərkəzi kimi fəaliyyət göstərəcək. Burada müştərilərə rahatlıq, texnologiya, peşəkar məsləhət xidməti və hərtərəfli satış sonrası dəstək təqdim olunacaq. Bu iki məkan birlikdə BYD-nin Azərbaycanda geniş və kompleks satış-xidmət şəbəkəsinin əsasını formalaşdıracaq. Məqsədimiz premium elektrik mobilliyini müştərilərə daha yaxın və daha əlçatan etməkdir",- Çarli Çen deyib və çıxışına belə davam edib: 

Hər gün yeni vakansiyalar - AzVak.az-da

"BYD-də biz hesab edirik ki, avtomobilin alınması müştəri səyahətinin yalnız başlanğıcıdır. Buna görə də hər iki diler mərkəzi peşəkar satış və satış sonrası xidmətlər göstərməyə hazır olacaq. Müştərilər avtomobilin seçimi və alınmasından tutmuş texniki xidmət, təmir və ehtiyat hissələrinin təminatına qədər tam “bir pəncərə” prinsipi əsasında xidmət ala biləcəklər.

Hər bir servis texniki əməkdaşı BYD tərəfindən geniş peşəkar təlimlərdən keçir və sertifikatlaşdırılır. Bu isə müştərilərimiz üçün daha etibarlı, rahat və keyfiyyətli xidmət təcrübəsini təmin edir. Komandamız avtomobilə sahiblik dövrünün bütün mərhələlərində müştərilərə diqqətli, etibarlı və peşəkar xidmət göstərməyə hazırdır."

BYD-nin Mərkəzi Asiya və Qafqaz üzrə Satışdan Sonrakı Xidmət Direktoru bildirirb ki, müştəri etimadını daha da gücləndirmək üçün BYD Azərbaycanda satılan bütün rəsmi avtomobillərə geniş zəmanət təminatı təqdim edir.

"Bu zəmanətə avtomobil üzrə 6 il və ya 100 min kilometr, batareya, elektrik mühərriki və elektrik idarəetmə blokları üzrə isə 8 il və ya 150 min kilometr zəmanət daxildir. Bu zəmanət BYD-nin texnologiyalarının keyfiyyətinə, etibarlılığına və davamlılığına olan inamını nümayiş etdirir. Bu gün yalnız başlanğıcdır. BYD Azərbaycanda inkişafını davam etdirdikcə, yerli xidmət imkanlarına və müştəri dəstəyi sistemlərinə investisiyaları da artıracaq".

Çarli Çen əlvə edib ki, yaxın gələcəkdə BYD xüsusi müştəri xidməti sistemi və regional ehtiyat hissələri anbarı yaratmağı planlaşdırır. Bu, ehtiyat hissələrinin əlçatanlığını əhəmiyyətli dərəcədə artıracaq və xidmət müddətini azaldacaq.

"Eyni zamanda, diler tərəfdaşlarımız müştəri müraciətlərinin operativ cavablandırılması üçün xüsusi çağrı mərkəzi və xidmət kanalları ilə fəaliyyət göstərəcəklər. Məqsədimiz hər bir müştərinin səsinin eşidilməsini təmin etməkdir. Sizin dəyərli rəyləriniz, təklifləriniz və hətta şikayətləriniz bizim üçün çox önəmlidir. Çünki bütün bu geribildirimlər xidmət keyfiyyətimizi davamlı olaraq yaxşılaşdırmağa kömək edəcək".

İş elanları AzVak.az-da