2026-cı ilin yanvar ayında Azərbaycana 181 min 637 əcnəbi vətəndaş səfər edib ki, bu da 2025-ci ilin eyni ayı ilə müqayisədə 8 min 984 nəfər və ya 5% artım deməkdir.

Dövlət Turizm Agentliyinin yaydığı məlumatda bildirilir ki, yanvar ayında Rusiyadan 2% artım ilə 42 min 342 nəfər, Türkiyədən 15.5% artım ilə 36 min 536 nəfər və İrandan 2.1% artım ilə 15 min 399 nəfər səfər sayı qeydə alınıb.

Cənubi Asiya regionunu üzrə Hindistandan gələnlərin sayı 9 min 70 nəfər təşkil edib. Yaxın Şərq regionunun əsas bazarı olan Səudiyyə Ərəbistanından gələnlərin sayı artım göstərərək 8 min 976 nəfərə çatıb. Bu da ötən ilin yanvarı ayı ilə müqayisədə 2 min 783 nəfər və ya 44.9% artım deməkdir.

İlk onluqda qərarlaşan digər ölkələr - Gürcüstan (8 min 734), Pakistan (6 min 758), Qazaxıstan (5 min 676), Özbəkistan (5 min 130) və İsrail (4 min 972) olub.

Regionlar üzrə dinamika göstərir ki, Yaxın Şərq ölkələrindən gələnlərin sayı 22% artaraq 26 min 240 nəfərə, Qərbi Avropa ölkələrindən gələnlərin sayı isə 44% artaraq 6 min 819 nəfərə çatıb.

Mərkəzi Asiyanın əsas bazarlarından olan Qazaxıstandan gələnlərin sayı 5 min 676 nəfər təşkil edib ki, bu da 2.5% artım deməkdir. Özbəkistandan gələnlərin sayı isə 5 min 130 nəfərə çataraq 72.3% artım nümayiş etdirib.

Qeyd edilib ki, 2026-cı ildən etibarən Dövlət Turizm Agentliyi və tabeliyindəki Azərbaycan Turizm Bürosu tərəfindən hədəf ölkələrdə ənənəvi təbliğat üsulları ilə yanaşı, rəqəmsal alətlərdən və sosial media kampaniyalarından daha geniş şəkildə istifadə etməklə marketinq və kommunikasiya fəaliyyətlərinin gücləndirilməsi planlaşdırılır.

“2024-2026-cı illər üzrə Turizm Marketinq Strategiyası”na müvafiq olaraq həyata keçiriləcək tədbirlər mədəniyyət turizmi, sağlamlıq turizmi, təbiət və macəra turizmi, işgüzar tədbirlər turizminin hədəf bazarlarda daha effektiv tanıdılmasına xidmət edəcək.

Beynəlxalq turizm marketinq fəaliyyəti müxtəlif hədəf bazarlar üzrə prioritetlərə uyğun olaraq onlayn, oflayn (beynəlxalq turizm sərgilərində iştirak, B2B və B2C görüşlər, seminarlar, təqdimatlar, xarici media və sənaye nümayəndələri üçün tanışlıq səfərləri) və media-kommunikasiya kanallarının inteqrasiyalı istifadəsini ehtiva edir. Məqsəd ilkin mərhələdə Azərbaycan haqqında rəqabətqabiliyyətli və çoxşaxəli turizm istiqaməti kimi məlumatlılığı artırmaq, növbəti mərhələdə Azərbaycanı brend kimi tanıtmaqla ölkəmizə səyahəti və marağı təşviq etmək, nəticə olaraq isə bu marağı real səfər qərarına çevrilməsinə təkan vermək və qlobal mövqeyini gücləndirməkdir.

Beynəlxalq turizm marketinq kampaniyaları planlaşdırılarkən qlobal turizm trendləri, regional dəyişikliklər, turistlərin səyahət davranışındakı transformasiyalar  əsas götürülür. Ümumilikdə, 2026-cı il üzrə marketinq kampaniyalarında əvvəlki illərin uğurlu təcrübəsinə əsaslanmaqla daha genişmiqyaslı, rəqəmsal və bazar ehtiyaclarına daha çevik uyğunlaşan bir yanaşma tətbiq edilməsi hədəflənir.

İş elanları AzVak.az-da