(®) 06 may 2025-ci il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovativ İnkişaf Mərkəzinin təşkilatçılığı və ölkəmizin lider investisiya şirkəti PAŞA Kapital İnvestisiya Şirkətinin sponsorluğu ilə həyata keçirilən “ZİRVƏ – Zəfər İdarəçisinin Rəhbərlik Vizyonu və Ənənələri” idarəçilik marafonunun rəsmi açılış mərasimi keçirilib.

Layihənin açılış mərasimində Dövlət Agentliyinin sədri Ülvi Mehdiyev və Milli Məclis sədrinin birinci müavini Əli Əhmədov çıxış ediblər.

“ZİRVƏ” idarəçilik marafonunun əsas məqsədi Ali Baş Komandan cənab İlham Əliyevin zəfər siyasətinin idarəetmə və liderlik sahəsində tətbiqinin geniş müzakirəsi, həmçinin tarixi yenidən yazan bu siyasətdən ilham alan gənc liderlərin, işgüzar şəxslərin bilik və bacarıqlarını artırmaqdır.

“İdarəetmədə yeni çağırışlar” mövzusunda keçirilən panel müzakirəsində spiker qismində iştirak edən PAŞA Kapital İnvestisiya Şirkətinin direktoru Ceyhun Hacıyev,  müasir dövrdə maliyyə liderlərinin qarşılaşdığı sınaqlar, rəqəmsallaşma və süni intellektin maliyyə sektoruna təsirinə dair fikirlərini bildirib, öz təcrübələrini paylaşıb.

06 may – 06 iyul tarixləri arasında davam edəcək marafon çərçivəsində dövlət və özəl sektoru təmsil edən 150 rəhbər şəxsin iştirakı ilə aşağıdakı fəaliyyətlərin icrası nəzərdə tutulub:

Dövlət rəsmiləri ilə təcrübə mübadiləsi görüşləri;

“İdarəetmədə innovativ liderlik bacarıqları” mövzusunda təlimlər;

“ASAN xidmət” modeli ilə tanışlıq tədbirləri;

İşğaldan azad edilmiş ərazilərə infoturlar.

Eyni zamanda qeyd edək ki, layihənin yekun mərhələsində iştirakçıların təəssüratlarını əks etdirən “Təəssüratlar toplusu” adlı onlayn kitab nəşr olunacaq.

PAŞA Kapital İnvestisiya Şirkəti haqqında daha ətraflı məlumat üçün 1548 nömrəsi ilə əlaqə saxlaya və ya https://www.pashacapital.az/ saytına daxil ola bilərsiniz.