"Bakıda taksidən istifadə 14 % azalıb"

"Bakıda taksidən istifadə 14 % azalıb"

Taksi və metrodan istifadə edənlərin sayı azalıb, avtobuslardan istifadə edənlərin sayı isə artıb

Azərbaycanda taksi xidməti sahəsində aparılan islahatlar nəticəsində Bakıda taksi səfərlərinin sayı təxminən 14 % azalıb.

Bunu Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev “Azərbaycanda mobilliyin transfirmasiyası proqramı”nın təqdimatında bildirib.

"Təhlillər onu göstərir ki, xüsusilə taksi ilə metroya və yaxud metrodan edilən səfərlərin sayı ciddi azalıb. Qısa məsafəli səfərlərin azalması hesabına ortalama səfər məsafəsi 8,5 km-dən 10 km-ə çatıb. Həmçinin avtobuslarla gündəlik daşıma sayı 100 min nəfər artaraq 1 milyon 600 minə çatıb", - deyə o qeyd edib.

Bundan başqa, nazir müavini bildirib ki, taksi sifarişi operatorları icazə əsasında fəaliyyət göstərməyə başlayıb, vətəndaşlara göstərilən xidmətin səviyyəsinin yüksəldilməsi üçün taksi sürücləri təlimlərə cəlb edilib: "AYNA-nın Təlim-Tədris Mərkəzində keçirilən təlimlərə bu günə qədər 14 mindən çox sürücü müraciət edib. Onlardan 11 mindən çoxu təlimlərdə iştirak edib. Amma bu məsələnin tam həlli deyil. Növbəti ilin əvvəlində taksi nəqliyyat vasitələrinə texniki tələblər tətbiq ediləcək. Hazırda tələblərin təsdiq edilməsi son mərhələdədir".

"Təəssüflər olsun ki, oxşar şəhərlərlə müqayisədə Bakıda hər min nəfərə düşən taksilərin sayı 4 dəfə çoxdur. Son dəyişikliklərə əsasən, 14 faiz taksi səfəri azalıb, xüsusən də 3 kilometrlik səfərlərin sayında azalma müşahidə olunub. Bir taksi operatorundan əldə etdiyimiz məlumata görə, ünvandan metroya və metrodan ünvana taksi ilə səfərlərdə 30-40 faiz azalma olub. İlkin mərhələdə 26 min səfərin taksilərdən ictimai nəqliyyata ötürülməsi nəzərdə tutulmuşdu. Artıq bu baş verib”, - deyə o xüsusi vurğulayıb.

18.12.2023 11:25

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az