Rusiya Kənd Təsərrüfatı Nazirliyinin mətbuat xidməti yaydığı məlumata görə, bu həftənin sonundan Rusiya Azərbaycandan toyuq yumurtası idxal etməyə başlayır. Məqsəd ölkədə artan yumurta qiymətlərini sabitləşdirməkdir.

Rusiya kimi böyük bir bazarın Azərbaycandan yumurta almağa başlaması ilə, ölkəmizdə bu məhsulun qiymətinin artacağı iddia olunur.

Azərbaycan Quş Əti, Yumurta İstehsalçıları və İxracatçıları Assosiasiyasının sədri Mürvət Həsənli Marja.az-a bildirdi ki, ölkəmizdən Rusiyaya ərzaqlıq yumurta ixracının daxili bazarda qiymətlərin artmasına səbəb olacağı gözlənilmir:

"Mən əminliklə deyirəm ki, "xeyr, qiymətlər qalxmayacaq". Qiymətlər 1 qəpik aşağı və yuxarı oynaya bilər. Amma onun üzərində qalxmaq şansı yoxdur. Ona görə ki, yumurta istehsalı ilə məşğul olan müəssisələrimiz yaxın 3 ayda istehsal güclərini 15-20% artıracaqlar. Rusiyanın bizdən istədiyini rahat qarşılaya biləcəyik. Bunula əlaqədar müvafiq qurumlarda görüşlər keçirmişik və lazımi dəstəyi almışıq".

Mürvət Həsənli, "Hazırda Rusiya bazarında problemlərin olduğunu bilirik" deyərək əlavə edib:

"Sanksiyalar ilə əlaqədar olaraq Rusiyada yumurta istehsalı azalıb. Peraparatların, vaksinlərin və ana sürüsünün az gəlməsi istehsala mənfi təsir edir. Günlük istehsalları təlabatı ödəmədiyi üçün digər ölkələrdən yumurta almağa çalışırlar".

Mürvət Həsənli əlavə edib ki, "Rusiya bazarı bizim üçün çox önəmlidir": 

"Biz 10 ilə yaxın idi çalışırdıq ki, Ruiya Azərbaycanın yumurta istehsal edən quşçuluq müəssisələrini reyestrə daxil etsin və müəssisələrimiz izafi istehsal olduqda bu ölkəyə yumurta ixrac edə bilsinlər. Amma, bizim müəssisələr müasir və standardlara uyğun olsalar da, müəyyən bəhanələr gətirərək onları qeydiyyata almaqdan imtina edirdilər.

Son vaxtlar Rusiyada yumurtaya təlabat ödənilmədi və nəticədə qiymətlər artdıqdan sonra onlar bizim 6 müəssisəni reyestrdə qeydiyyata aldı. Onlar "Giləzi Quşçuluq", "Hacıqabul Quşçuluq", "Muğan Quşçuluq", "Ləzzət Quşçuluq", "Pirsaat Quşçuluq" və "Yaşma Quşçuluq" şirkətlərdir. Məndə olan məlumata görə, dünəndən "Giləzi Quşçuluq" və "Hacıqabul Quşçuluq" Rusiyaya yumurta ixracına başlayıblar".

Mürvət Həsənli vurğulayıb ki, hər zaman Azərbaycan Rusiyadan yumurta idxal edirdi, bu gün isə ölkəmiz Rusiyaya yumurta göndərməyə başlayır: 

"Rusiya bazarı bizim üçün yeni və böyük bir bazardır. Rusiya bazarına satmaq bizə daha sərfəlidir. Hazırda Azərbaycandan Yaxın Şərq ölkələrinə – Qətərə, Səudiyyə Ərəbistanına, İraqa və digər ölkələrə yumurta ixrac edilir.  Oktyabrın 1-dək olan məlumata görə, biz 40 milyon ədəd ixrac etmişik".

Assosiasiyasının sədri əlavə etdi ki, Azərbaycanın ərzaqlıq yumurtaya gündəlik təlabatı 3,2-3,6 milyon ədəd, daxili istehsal isə 4,6-4,9 milyon ədəd civarındadır. Ölkənin təlabatı tam ödənilir.

Həmçinin oxu

Azərbaycan istehsalı toyuq yumurtalarının Rusiyaya daşınmasına başlanır