Artan inflyasiyanın və alıcılıq qabiliyyətinin azalması fonunda Avropa əhalisi daha da yoxsullaşır, Amerikanın gəlirləri isə yüksəlir.

Marja.az xəbər verir ki, bu barədə bazar ertəsi “The Wall Street Journal” (WSJ)  İqtisadi Əməkdaşlıq və İnkişaf Təşkilatının (OECD) məlumatlarına istinadən məlumat yayıb.

Xəbərə görə, 2019-cu ilin sonundan etibarən avro zonasında alıcılıq qabiliyyəti 1% azalıb, ABŞ-da isə güclü əmək bazarı və gəlirlərin artması səbəbindən 9% artıb. 15 il əvvəl bu rəqəmlər bərabər olsa da, hazırda qlobal istehlakın 18%-i Avropanın, 28%-i isə ABŞ-ın payına düşür.

Avropalıların alıcılıq qabiliyyətinə əmək haqlarının azalması mənfi təsir göstərir - Almaniyada 2019-cu ildən bu yana 3%, İtaliya və İspaniyada 3,5%, Yunanıstanda isə 6% azalıb.

Amerikalıların maaşları eyni müddət ərzində 6% artıb. OECD-nin məlumatına görə, ABŞ-da orta illik əmək haqqı 2019-cu ildəki 73,19 min dollara qarşı 2022-ci ildə 77,46 min dollar olub. Müqayisə üçün qeyd edək ki, Almaniya sakinləri orta hesabla 58,94 min dollar, Böyük Britaniya sakinləri 53,99 min dollar, Fransa sakinləri  52,76 min dollar, İtaliya sakinləri  44,89 min dollar, İspaniya sakinləri  42,86 min dollar və Yunanıstan sakinləri  25,98 min dollar alırlar.

Beynəlxalq Valyuta Fondunun (BVF) məlumatına görə, son 15 ildə avrozonanın iqtisadiyyatı 6%, ABŞ iqtisadiyyatı isə 82% artıb. 2008-ci ildə avrozonanın (14,22 trilyon dollar) və ABŞ-ın (14,77 trilyon dollar) ÜDM-i müqayisə oluna bilərdi. 2023-cü ildə ABŞ ÜDM-i (26,86 trilyon dollar) Avropanı (15,07 trilyon dollar) 11 trilyon dollardan çox ötüb. Avropa Beynəlxalq Siyasi İqtisadiyyat Mərkəzinin hesabatına görə, bu tendensiya davam edərsə, 2035-ci ildə ABŞ və Avropa arasında adambaşına düşən istehsal fərqi Yaponiya və Ekvador arasındakı fərqlə müqayisə oluna bilər.

İqtisadi böhran fransızların daha az qırmızı şərab içməsinə səbəb olub, ispanlar zeytun yağına qənaət edirlər, finlər elektrik enerjisi ucuzlaşanda saunadan istifadə edirlər. Almaniyada ət və süd istehlakı son 30 ildə rekord aşağı səviyyəyə düşüb və İtaliyada makaron qiymətləri iki dəfə artıb. Avropanın orta sinfi xüsusilə məni təsir görür.