"Zəlzələ əmlak bazarında tərəddüdlər yaradır, cüzi ucuzlaşma gözləniləndir"

"Zəlzələ əmlak bazarında tərəddüdlər yaradır, cüzi ucuzlaşma gözləniləndir"

Əhalinin böyük əksəriyyəti zövq və maddi imkan, eləcə də infrastrukturun əlverişli olması baxımından bina evlərinə üstünlük verirlər. Lakin ayrı-ayrı dövrlərdə təbiətdə baş vermiş zəlzələ, daşqın və bu kimi təbii fəlakətlər müvəqqəti olaraq insanların psixologiyasına təsir edir və bu da əmlak bazarında müəyyən tərəddüdlər yaradır. Xüsusilə bu təsir bina evlərində daha qabarıq şəkildə özünü göstərir. Baş vermiş zəlzələ insanların şüurunda müəyyən iz buraxsa da, müvəqqəti xarakter daşıyır.

Bunu açıqlamasında iqtisadçı-ekspert Rəşad Hüseyn bildirib.

“Düşünürəm ki, bu, əmlak bazarında müvəqqəti durğunluq yarada bilər, lakin böyük miqyasda təsiri mümkün deyil. Növbəti dövrlərdə zəlzələ baş verməzsə, əmlak bazarında yaranmış tərəddüdlər tədricən yox olub gedəcək. Yaxın iki-üç ayda bina mənzillərində cüzi ucuzlaşma gözləniləndir, lakin davamlı olmayacaq. Hər keçən dövr ərzində daşınmaz əmlakın qiyməti durmadan artır. Bu qiymətlər fonunda zəlzələnin təsirləri yaddaşlardan silindikcə qiymətlərdə yenidən artım müşahidə ediləcək”, - deyə ekspert qeyd edib.

R.Hüseyn vurğulayıb ki, bir neçə ay əvvəl Türkiyədə baş vermiş zəlzələdən sonra bina evlərinin qiymətlərində durğunluq yaranmışdı. Lakin həmin dövrdən bir müddət sonra evlərin qiymətlərində yenidən artım müşahidə olundu. Hansı ki, Türkiyədə baş vermiş zəlzələnin miqyası daha böyük idi. Amma sözsüz ki, əhalinin bir hissəsi zəlzələdən sonra həyət evlərinə üstünlük verə bilər. Bu da qaçılmaz haldır. Lakin bu say da əmlak bazarındakı qiymətlərə təsir etmək gücündə deyil.

05.07.2023 11:57

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az