Yaponiyanın “Tet İnternational Development” şirkətinin törəmə müəssisəsi olan “Zaqatala AGRO İndustry” MMC-nin tütünqurutma məntəqəsində 2022-ci ildə 311 ton quru tütün istehsal edilib. Rusiya şirkətləri ilə bağlanmış müqaviləyə əsasən, ötən ilin sonunadək bu ölkənin bazarlarına 60 ton quru tütün ixrac olunub və proses hazırda davam etdirilir.

“Tet İnternational Development” şirkəti Azərbaycanda 4 ildir ki, fəaliyyət göstərir. Əsasən kənd təsərrüfatı sahəsinə sərmayələr qoyan şirkət ölkəmizdə tütünçülüyün inkişafı ilə bağlı bir sıra layihələr həyata keçirir. Hazırda Azərbaycanda şirkətin 4 tütünqurutma müəssisəsi işləyir. Bu müəssisələr Oğuz, Tovuz, Şəki və Zaqatala rayonlarında yerləşir. Şirkətin törəmə müəssisəsi olan “Zaqatala AGRO İndustry” MMC-nin tütünqurutma məntəqəsi bu müəssisələr içərisində ən böyüyüdür.

Yaponiya şirkəti tərəfindən Zaqatala rayonunda emal müəssisəsinin tikintisinə 2021-ci ilin yanvarında başlanılıb və iyulda istifadəyə verilib. Məntəqədə 120 tütünqurutma kamerası var. Fermerləri tütün şitilləri ilə təmin etmək üçün məntəqənin özündə 48 ədəd istixana quraşdırılıb. Torpaq mülkiyyətçilərinin işini asanlaşdırmaq məqsədilə müəssisəyə Türkiyədə istehsal olunan şitilvuran aqreqatlar da gətirilib və tütün əkini zamanı fermerlərin istifadəsinə verilir.

Müəssisənin istehsalat rəisi Rəhim Kələşovun verdiyi məlumata görə, tütün istehsalı ilə əlaqədar 2022-ci ildə Zaqatala, Qax, Şəki və Balakən rayonlarında 42 fermerlə müqavilə bağlanılıb, onlara şitil yetişdirmək üçün pulsuz toxum verilib. Ötən il müəssisə tərəfindən Zaqatala rayonunda 154,5 hektar, Qaxda 101,5 hektar, Şəkidə 55 hektar, Balakəndə 15 hektar olmaqla, ümumilikdə, 326 hektar sahədə “Virciniya botaniki” növlü tütün əkilib. Mövsüm vaxtı hər gün məntəqəyə qurudulmaq üçün orta hesabla 25-30 ton yaşıl tütün kütləsi daxil olub. Ötənilki mövsümdə müəssisədə 55 nəfər daimi və 80 nəfərədək mövsümi işçi çalışıb.

İstehsalat rəisinin sözlərinə görə, 2023-cü ildə “Zaqatala AGRO İndustry” MMC tərəfindən rayonlarda 420 hektar sahədə “Virciniya botaniki” növlü tütün əkilməsi proqnozlaşdırılır. Hazırda müəssisənin istixana təsərrüfatında şitil yetişdirilməsi üçün hazırlıq işləri görülür. Fevralın 5-dən yer, ayın 20-dən isə su şitillərinin yetişdirilməsinə başlanılacaq.

İllik 12.99%-dən 40 000 AZN-dək zaminsiz komissiyasız kredit!

© Azərtac