Qazaxıstanda əvvəllər McDonald's brendi ilə işləmiş restoranlar bazar ertəsi günü brendsiz işini bərpa edəcək.

Marja xəbər verir ki,  McDonald's-ın Qazaxıstandakı françayzi "Food Solutions KZ" məlumat yayıb.

Yanvarın 5-də McDonald's-ın Qazaxıstandakı mətbuat xidməti bildirmişdi ki, Qazaxıstanın "Food Solutions KZ" şirkəti tərəfindən idarə olunan fast food restoranları bundan sonra McDonald's brendi altında fəaliyyət göstərməyəcək. Qeyd edilmişdi ki, fəaliyyətin bərpası və yeni adla yeni fast food restoranlarının açılışının vaxtı yaxın vaxtlarda açıqlanacaq. 

Yanvarın 10-da “Food Solutions KZ LLP” şirkətinin rəhbəri Aset Maşanov jurnalistlərə bildirib ki, şirkətin əsas vəzifəsi bəlkə də brendsiz, gələcəkdə isə yeni yerli brend altında işi bərpa etməkdir.

Əvvəllər McDonald's loqosu yerləşdirilən restoranlardan birinin damında indi qazax və rus dillərində "Biz açığıq" lövhələri quraşdırılıb. Restoranın qapısında restoranın saat 10.00-da  açılacağı barədə elan var.

Məlumat lövhələrinə əsasən, restoran öz müştərilərinə “Beef Tay”, “Chicken Tay”, “Grand Cheeseburger”, “Fish Burger” və s. təklif edəcək.

"Food Solutions KZ"-nin mətbuat xidməti bildirir ki, restoranların açılışı tədricən aparılacaq, ilkin mərhələdə Alma-Atada beş restoran açılacaq. Press-relizdə deyilir ki, şirkət yenilənmiş menyu, digər restoranların yenidən açılış cədvəli və yeni adla bağlı tam təfərrüatları tezliklə təqdim edəcək.

"Bu, şirkətimizin həyatında yeni bir səhifədir. Biz hər bir şəhərdə tədricən restoranların qapılarını qonaqların üzünə açmağa hazırlaşırıq. Biz iaşə sənayesində lider mövqeyimizi qorumaq niyyətindəyik. Hələlik restoranlar adsız açılacaq, lakin yaxın vaxtlarda biz yeni adımızı təqdim edəcəyik”, - şirkətin press-relizində bildirilir.

Qazaxıstandakı McDonald's (Food Solutions KZ LLP) yerli təchizatda məhdudiyyətlər səbəbindən noyabrın ortalarında işlərini dayandırıb. McDonald's-ın Qazaxıstandakı françayzi 590 milyon dollarlıq sərvəti ilə 2021-ci ildə "Forbes Kazakhstan" jurnalına görə ölkənin ən varlı iş adamları reytinqində 14-cü yerdə olan Kayrat Boranbayevdir.

McDonald's 2022-ci ilin martında Rusiyadakı fəaliyyətini dayandırıb və daha sonra şirkət bazarı tamamilə tərk edərək Rusiyadakı biznesini satmağa qərar verib.