Dərman vasitələri haqqında Azərbaycan Respublikasının Qanununa uyğun olaraq, ölkəmizə dərman vasitələrinin idxalını əsasən istehsal və topdansatış əczaçılıq fəaliyyəti ilə məşğul olan müəssisələr həyata keçirirlər.

Səhiyyə Nazirliyi Analitik Ekspertiza Mərkəzindən verilən xəbərə görə, dərman vasitələrinin idxalı zamanı həyata keçirilən ekspertizanın xüsusiyyətləri Nazirlər Kabinetinin 2019-cu il 25 dekabr tarixli 502 nömrəli qərarı ilə təsdiq edilmiş dərman vasitələrinin ekspertizasının aparılması qaydası ilə tənzimlənir:

“Son zamanlar ölkənin dərman təminatı ilə bağlı məsələlər müzakirə edilərkən idxal prosesi zamanı yaranan problemlərdən danışılır. Hətta Analitik Ekspertiza Mərkəzi idxal prosesinin ləngidilməsində ittiham edilir. İdxal zamanı ekspertizanın aparılması üçün idxalçı quruma sənədlər daxil edilməlidir. Bu sənədlər - idxalçıya verilmiş istehsal və ya topdansatış lisenziyasının surəti, vergi ödəyicisinin umota alınmasını təsdiq edən şəhadətnamənin surəti, alqı-satqı müqaviləsi, əgər müqavilə Azərbaycan, rus, ingilis dilində olmadıqda Azərbaycan dilinə tərcüməsi, hesab fakturanın surəti, hesab fakturada dərman vasitələrinin seriyası göstərilmədikdə qablaşdırma vərəqəsinin surəti, istehsalçının dərman vasitələrinin hər birin seriyasına dair verdiyi keyfiyyət sertifikatının surəti, mənşə sertifikatının surətidir. Təqdim olunan sənədlərdə uyğunsuzluq aşkar olunmadıqda dərman vasitələrindən 1 iş gün müddətində nümunələr ötürülərək quruma təqdim olunur. Təqdim olunan nümunələrin dövlət qeydiyyatı, qablaşdırılması, istifadə üzrə təlimatı yoxlanılır. Əgər nümunələrdə problem aşkar olunmasa, bu nümunələr analiz olunmaq üçün laboratoriyaya göndərilir. Uyğunluq sertifikatı verildikdən sonra dərman vasitələrinin idxalına dair məktub hazırlanır. Dərman vasitələrinin ekspertizasının aparılması 20 təqvim günündən çox olmayan müddətdə həyata keçirilir”.

AEM idxal zamanı dərman vasitəsi nümunələrində üzləşdikləri problemləri də açıqlayıb:

“Bunlardan biri qeydiyyatla bağlı problemlərdir – yararlılıq müddətində; saxlanma şəraitində ziddiyyətlərdir. Qablaşdırma ilə bağlı problemlər – qablaşdırmanın təsdiqinin olmaması; qeydiyyatda olan təsdiqə uyğun gəlməməsi; qablaşdırmanın təsdiq müddətinin bitməsidir. İstifadə üzrə təlimatla bağlı problemlər – Azərbaycan dilində olmaması; istifadə üzrə təlimatda yararlılıq müddətinin və saxlanma şəraitinin qablaşdırılmanın üzərində göstərilənlərlə uyğun gəlməməsi; yeni təsdiqlənmiş istifadə üzrə təlimatın olduğu halda təsdiqinin vaxtı bitmiş içliklərin qablaşdırmalara yerləşdirilməsidir. Sənədlərlə bağlı problemlər – düzgün mənşə olmadıqda; düzgün müqavilə təqdim edilmədikdə; hesab fakturada seriyalar göstərilmədikdə seriyaların göstərildiyi qablaşdırma vərəqinin olmamasıdır. İdxal prosesi zamanı vaxt itkisinə yol verməmək üçün tələb olunan sənədlər vaxtında və tam olaraq təqdim edilməlidir”.