Çinin 2022-ci ilin 11 ayı ərzində ixracı və idxalı, ölkədə çoxsaylı yerli koronavirus epidemiyalarına və karantinlərə, habelə çətin beynəlxalq vəziyyətə baxmayaraq, müvafiq olaraq 9,1% və 2% artıb.

Marja xəbər verir ki, bu barədə Çin Xalq Respublikasının Baş Gömrük İdarəsi məlumat yayıb.

Hesabat dövründə Çinin ixracı illik müqayisədə 9,1% artaraq 3 trilyon 292 milyard dollar, idxalı isə 2% artaraq 2 trilyon 480 milyard dollar təşkil edib.

Xarici ticarətin dollar ifadəsində ümumi həcmi 2022-ci ilin 11 ayı ərzində 5,9% artaraq 5 trilyon 781 milyard dollara çatıb. Çinin xarici ticarət dövriyyəsinin müsbət saldosu 802,04 milyard dollar olub.

Bununla belə,  Baş Gömrük İdarəsi  ötən ay xarici ticarət artımının azaldığını bildirir. Belə ki, noyabrda Çinin xarici ticarətinin həcmi 522,34 milyard dollar təşkil edib ki, bu da ötən ilin noyabr ayı ilə müqayisədə 9,5% azdır.

Noyabrda Çinin ixracı 2021-ci ilin noyabrına nisbətən 8,7% azalaraq 296,09 milyard dollar, keçən ay idxal da 2021-ci ilin noyabr ayı ilə müqayisədə 10,6% azalaraq 226,25 milyard dollar təşkil edib.

Çinin xarici ticarət balansının profisiti noyabrda əvvəlki aydakı 85,15 milyard dollardan 69,84 milyard dollara düşüb. Proqnoz 79,05 milyard dollar idi.  

Çinin ticarət balansı noyabr ayında gözlənildiyindən daha çox azalıb. COVID ilə əlaqəli kilidləmələrin olduğu ölkənin ay ərzində həm ixracı, həm də idxalı azalıb.

Yanvar-noyabr aylarında (11 ayda) Çinlə ticarət həcminə görə Cənub-Şərqi Asiya Ölkələri Assosiasiyası (ASEAN), Avropa İttifaqı (Aİ) və ABŞ lider olaraq qalıb. Çinin Aİ ilə ticarəti 779,796 milyard dollar, ASEAN ilə 886,555 milyard dollar, ABŞ ilə isə 697,694 milyard dollar təşkil edib. Hesabat dövründə Çinin Latın Amerikası ölkələri ilə ticarət dövriyyəsi 448,391 milyard dollar, Afrika ölkələri ilə isə 259,125 milyard dollar təşkil edib.

Xatırladaq ki, 2021-ci ildə Çinin xarici ticarət dövriyyəsi 30% artaraq 6,051 trilyon dollar, ixracı isə 29,9% artaraq 3,364 trilyon dollar, idxalı isə 30,1% artaraq 2,687 trilyon dollar təşkil etmişdi.