Pakistanın Baş naziri Məhəmməd Şahbaz Şərif oktyabrın 10-da Azərbaycan Prezidenti İlham Əliyevə zəng edib. Telefon danışığı zamanı iki ölkə arasında iqtisadi, ticarət və investisiya əməkdaşlığının genişləndirilməsi, eləcə də Azərbaycanın “ASAN xidmət” modelinin Pakistanın digər bölgələrində tətbiqi məsələləri müzakirə olunub.

Marja.az xəbər verir ki, bu barədə Azərbaycan Prezidentinin Mətbuat Xidməti məlumat yayıb.

Telefon danışığı zamanı Azərbaycan ilə Pakistan arasında dostluq, qardaşlıq və strateji tərəfdaşlıq münasibətlərinin inkişafından məmnunluq ifadə olunub.

Tərəflər yüksək səviyyədə mütəmadi görüşlərin və məsləhətləşmələrin ikitərəfli əlaqələrin möhkəmləndirilməsində mühüm rol oynadığını vurğulayıblar.

Pakistanın Baş naziri Şahbaz Şərif ölkə xalqının Prezident İlham Əliyevə və Azərbaycan xalqına böyük hörmət və ehtiram bəslədiyini bildirib.

İqtisadi və investisiya əməkdaşlığının genişləndirilməsi müzakirə olunub

Telefon danışığında Azərbaycan və Pakistan arasında siyasi sahədə mövcud yüksək səviyyəli münasibətlərin iqtisadi, ticarət və investisiya sahələrində əməkdaşlığın genişləndirilməsi ilə müşayiət olunmasının vacibliyi qeyd edilib.

Tərəflər iki ölkə arasında strateji tərəfdaşlığın iqtisadi istiqamətdə də inkişaf etdirilməsinin əhəmiyyətini vurğulayıblar.

Pakistan Azərbaycandan “ASAN xidmət”lə bağlı yeni dəstək istəyib

Şahbaz Şərif Azərbaycanın “ASAN xidmət” modeli əsasında Pakistanın paytaxtı İslamabadda yaradılmış xidmət mərkəzinin fəaliyyətindən məmnunluğunu ifadə edib.

Pakistanın Baş naziri bu təcrübənin ölkənin digər bölgələrində də tətbiq edilməsi məqsədilə Azərbaycan tərəfindən dəstək göstərilməsini xahiş edib.

Prezident İlham Əliyev bu istiqamətdə lazımi dəstəyin göstərilməsinə razılıq verib.

Şahbaz Şərif buna görə Azərbaycan Prezidentinə təşəkkür edərək, göstəriləcək dəstəyi iki ölkə arasında dostluq və həmrəyliyin növbəti nümunəsi kimi qiymətləndirib.

Regional və beynəlxalq məsələlər ətrafında fikir mübadiləsi aparılıb

Telefon danışığı zamanı Pakistanın son dövrlərdə regional və beynəlxalq səviyyədə dialoqun təşviqi, vasitəçilik və gərginliyin azaldılması istiqamətində göstərdiyi diplomatik səylər təqdir edilib.

Azərbaycan Prezidenti və Pakistanın Baş naziri ikitərəfli və çoxtərəfli gündəlikdəki məsələləri, həmçinin regional və beynəlxalq vəziyyəti müzakirə ediblər.