Avropa İttifaqının Rusiya neftinə tavan qiymət tətbiq etməsi Avropa ölkələrinin özləri üçün maksimum mənfi təsirlə nəticələnəcək.

Marja xəbər verir ki, bu fikri bazar ertəsi Çinin “ Global Times” qəzetinin müəllifləri yerli ekspertlərin rəyinə istinadən bildiriblər.

Xiamen Universitetinin (Şərqi Çin) Enerji İqtisadiyyatı Tədqiqat Mərkəzinin direktoru Lin Baoqiang, "Avropa enerji qiymətlərinin daha yüksək olmasına hazırlaşmalıdır" deyib.

O qeyd edib ki, Moskva çətin ki, endirimli qiymətlərlə neft satışı həyata keçirməyə razı olsun. Ekspert qeyd edib ki, eyni zamanda Avropa İttifaqı ABŞ-dan neft idxalını artırmalı olacaq.

"Yaxın gələcəkdə Avropa demək olar ki, qaçılmaz olaraq bu enerji daşıyıcısının qiymətlərinin kəskin artacağını gözləyəcək", - Lin Baoqiang əlavə edib.

"Dünyada inflyasiyanın yüksəlməsi fonunda bu, istər-istəməz mövcud çətinlikləri artıracaq. Son onilliklərdə rekord qiymət artımı qeydə alan Avropa İttifaqı ən güclü zərbəni görəcək", - məqalədə vurğulanır.

Çin Sosial Elmlər Akademiyasının Rusiya, Şərqi Avropa və Mərkəzi Asiya Araşdırmaları İnstitutunun üzvü Zhang Honqun sözlərinə görə, qiymət tavanının tətbiqi Moskvanın “diplomatik səviyyədə kəskin əks tədbirlərə” üz tutması təhlükəsi yaradır. Qəzet yazır: “Görünən odur ki, Avropa İttifaqı Rusiya Federasiyasından daha çox əziyyət çəkəcək, çünki Rusiya tərəfi Avropadan kənarda alternativ bazarlar axtara bilər”.

Ekspert: Ukrayna da problemlərlə üzləşəcək

Avropa İttifaqı ölkələrinin Rusiya neftinin qiymətinə məhdudiyyət tətbiq etməsi səbəbindən Ukrayna neft məhsullarının qıtlığı və onların maya dəyərinin artması ilə üzləşəcək. Bu fikri Ukraynanın "A-95" konsaltinq qrupunun direktoru Sergey Kuyun bildirib.

Ekspert özünün Facebook səhifəsində Bolqarıstanda, Yunanıstanda, İtaliyada neft tədarükü və neft məhsullarının istehsalı ilə bağlı problemləri qeyd edib:

"Bu, nəyə gətirib çıxaracaq - qiymətlərin artmasına və yanacağın dəniz və quru yolu ilə daşınması xidmətlərinin yüksəlməsinə".Dekabrın 5-də Avropa İttifaqının Rusiya neftinin barreli üçün 60 dollar səviyyəsində müəyyən etdiyi qiymət tavanı qüvvəyə minir. Bəzi avropalı ekspertlər bu tədbirin qlobal iqtisadiyyata mənfi təsir edəcəyindən ehtiyat edirlər. Rusiya prezidenti Vladimir Putin daha əvvəl xəbərdarlıq etmişdi ki, Rusiya belə şərtlər altında enerji məhsullarını ixrac etməyəcək.