Səudiyyə Ərəbistanının Xarici İşlər Nazirliyi ABŞ administrasiyasının OPEC+ qrupunun neft hasilatının azaldılması qərarının bir ay təxirə salınmasını istədiyini açıqlayıb.

Marja xəbər verir ki, Səudiyyə Ərəbistanının Xarici İşlər Nazirliyi təxirə salınma tələbi ilə bağlı yazılı açıqlama yayıb.

Açıqlamada, OPEC+ qrupunun noyabr ayı etibarilə gündəlik neft hasilatını 2 milyon barel azaltmaq barədə qərarının iqtisadi çərçivədə qəbul edildiyi, sözügedən qərarın OPEC+ qrupu ölkələri tərəfindən birgə qəbul edildiyi, heç bir ölkəyə xas olmadığı və neft bazarlarında tələb və təklif balansını nəzərə aldığı qeyd edilib. 

Neft bazarının vəziyyəti ilə bağlı OPEC+ qrupundan kənar müttəfiqlər və tərəfdaşlarla dialoqun və fikir mübadiləsinin vacibliyi vurğulanan bəyanatda, Səudiyyə Ərəbistanının ABŞ administrasiyası ilə apardığı davamlı məsləhətləşmələr zamanı Vaşinqtonun “qərarı bir ay təxirə salmağı” təklif etdiyi bildirilib.

“Lakin bütün iqtisadi təhlillər göstərir ki, qərar qəbulu prosesinin təklif olunduğu kimi bir ay təxirə salınması mənfi iqtisadi nəticələrə səbəb olacaq”, - deyə məlumatda bildirilir.

“Səudiyyə Ərəbistanı, qlobal iqtisadiyyatı bazar dalğalanmalarından qorumaq üçün üzərində çalışdıqları məqsədləri dəyişdirmək üçün hər hansı bir hərəkəti və ya səyi rədd edir”, - bəyanatda deyilir.

Bəyanatda deyilir: "İqtisadi çətinliklərin öhdəsindən gəlmək üçün konstruktiv, qeyri-siyasi dialoq və bütün ölkələrin maraqlarına nəyin xidmət etdiyini müdrik və rasional qiymətləndirmək lazımdır".

OPEC+ qrupunun energetika və neft nazirləri oktyabrın 5-də Avstriyanın paytaxtı Vyanada keçirilən toplantıda noyabr ayından etibarən gündəlik neft hasilatının 2 milyon barel azaldılması barədə qərar qəbul ediblər.

Bu qərardan sonra Ağ Ev Milli Təhlükəsizlik Şurasının Strateji Kommunikasiyalar Direktoru Con Kirbi oktyabrın 11-də ABŞ prezidenti Co Baydenin Səudiyyə Ərəbistanı ilə əlaqələri yenidən nəzərdən keçirdiyinə dair açıqlamalar verib.