Qlobal bazarlarda diqqətlər ABŞ-da açıqlanacaq inflyasiya məlumatlarına yönəldilib. ABŞ-da inflyasiya məlumatlarından əvvəl bazarlarda risk iştahı aşağıdır. Məlumatlar Bakı vaxtı ilə saat 16:30-da açıqlanacaq.

Marja xəbər verir ki, S&P 500 indeksi altıncı ticarət günündə düşüb, indeks 2020-ci ilin noyabrından bəri ən aşağı səviyyəyə geriləyib. 

Asiya fond bazarlarında geniş miqyaslı enişlər müşahidə olunur. Hong Kong Hang Seng 1%, Yaponiyanın Topix isə 0,6% ucuzlaşıb.

Dollar bir çox valyutalar qarşısında güclü olaraq qalır, Bloomberg Dollar İndeksi isə 1347 səviyyəsində sabitdir. Yen 24 ilin ən aşağı səviyyələrindədir, bazar iştirakçıları Yaponiyadan yeni bir müdaxilənin olub-olmayacağını izləyirlər. Dollar/yen məzənnəsi səhər saatlarında 0,1 faiz artaraq 146,8 olub.

ABŞ-da inflyasiyanın yavaşlaması gözlənilir

Ötən aylarda bir çox bazarlarda kəskin dalğalanmalar yaradan ABŞ inflyasiyasında yavaşlama gözlənilir. Bloomberg-in sorğusuna qatılan 52 iqtisadçının proqnozuna görə, sentyabrda istehlak qiymətlərinin artımı avqust ayındaki 8,3 faiz artımdan geri qalaraq, illik 8,1 faiz olacaq.

ABŞ-da istehlak qiymətlərinin aylıq 0,2 faiz artacağı gözlənilir.

Enerji və ərzaq istisna inflyasiyanın avqust ayındaki 6,3 faizdən daha sürətli - 6,5 faiz artacağı gözlənilir.

Bloomberg-in iqtisadçılarına görə, sentyabr ayı inflyasiya məlumatları FED-in noyabr ayında faiz artırmasına təsir etməsə də, dekabr qərarı üçün əhəmiyyətli bir məlumat ola bilər.

İqtisadçılar bildirirlər ki, gözləniləndən yüksək olan inflyasiya göstəriciləri dekabr ayında faiz artımının ölçüsünün 50 baza bəndinə düşməsini çətinləşdirəcək. İqtisadçılar öz qiymətləndirmələrində “OPEC+un hasilatı azalatmaq qərarından sonra artan benzin qiymətləri və hələ də yüksək baza inflyasiya səbəbindən ilin qalan hissəsində çox aşağı inflyasiya gözləmirik”,- deyib.