ABŞ Səudiyyə Ərəbistanına OPEC+-ın neft hasilatının azaldılması ilə bağlı qərarını bir ay təxirə salmasın təklif edib.

Marja xəbər verir ki, bu barədə çərşənbə günü "The Wall Street Journal" danışıqlardan xəbərdar olan mənbələrə istinadən məlumat yayıb.

Onların məlumatına görə, oktyabrın 5-də Vyanada OPEC+ sazişində iştirak edən dövlətlərin görüşündən bir müddət əvvəl ABŞ nümayəndələri “Səudiyyə Ərəbistanı və digər böyük neft hasil edən Fars körfəzinin ölkələrindəki həmkarlarına təcili müraciətlə zəng edib. Onlar hasilatın həcminin azaldılması ilə bağlı qərarı bir ay təxirə salınmasını istəyiblər. O cümlədən, Amerika nümayəndələri qeyd ediblər ki, qərar təxirə salınarsa və Brent markalı neftin qiyməti 75 dollar/barelə düşərsə, ABŞ strateji ehtiyatlarını artırmaq üçün bazar qiymətinə neft alacaq.

“The Wall Street Journal” yazır ki, Ər-Riyad nümayəndələri Amerika tərəfinin təklifini rədd ediblər. Nəşrin mənbələrinə görə, Ər-Riyadda təklif, Konqresə aralıq seçkilər ərəfəsində “Bayden administrasiyasının siyasi hiyləsi” hesab edilib.

OPEC+ sazişinin üzvü olan ölkələr oktyabrın 5-də Vyanada keçirilən görüşdə neft hasilatının noyabr ayından başlayaraq gündəlik 2 milyon barel azaldılması barədə razılığa gəliblər, həmçinin sazişin müddətini 2023-cü ilin sonuna qədər uzadıblar. Qərardan sonra neft qiymətləri yüksəlib. 

ABŞ prezidenti Co Bayden CNN-ə deyib ki, ABŞ-ın etirazına baxmayaraq OPEC+-ın hasilatı azaltmaq barədə qərarı ABŞ və Səudiyyə Ərəbistanı arasında münasibətlərə təsir edəcək.

Bayden Səudiyyə Ərəbistanı ilə münasibətlərlə bağlı hansı variantları nəzərdən keçirdiyini açıqlamayıb.

Baydenin bəyanatı Senatın Xarici Əlaqələr Komitəsinin sədri, senator Bob Menendezin ABŞ-ı Səudiyyə Ərəbistanı ilə bütün əlaqələri, o cümlədən silah satışını dərhal dondurmağa çağırmasından bir gün sonraya təsadüf edir.

Ağ Evin Milli Təhlükəsizlik sözçüsü Con Kirbi bildirib ki, prezident Co Bayden ABŞ və Səudiyyə Ərəbistanı arasında ikitərəfli münasibətlərə yenidən baxılmalıdır.