"Azərenerji" ASC 2021-ci ili 147 milyon 227 min manat xalis mənfəət ilə başa vurub. Halbuki, dövlət şirkəti 2020-ci ili 206 milyon 924 min manat xalis zərər ilə bağlamışdı. Xalis mənfəət ilə əlaqədar olaraq "Azərenerji"nin yığılmış zərəri 2 milyard 748 milyon 472 min manatdan 2 milyard 601 milyon 245 min manata düşüb (xalis mənfəət qaədər azalıb). Xalis mənfəət- satışdan gəlirlərin artması, maliyyə xərclərinin azalması və xarici valyuta mübadiləsindən gəlir əldə edilməsi hesabınadır. 

Ötən il "Azərenerji"nin satışdan gəlirləri 207 milyon 733 min manat və ya 19,4% artıb.

Marja.az "Azərenerji" ASC-nin 31 dekabr 2021-ci il tarixinə bitən il üzrə Konsolidə edilmiş Maliyyə Hesabatlarına istinadən xəbər verir ki, 2020-ci ildə enerji satışından gəlirlər 1 milyard 73 milyon 179 min manat ikən, 2021-ci ildə 1 milyard 280 milyon 912 min manata yüksəlib.

Ötən il "Azərenerji" ASC-nin cəmi əməliyyat gəlirləri 1 milyard 320 milyon 335 min manat, cəmi əməliyyat xərcləri 1 milyard 189 milyon 775 min manat, gəlirlər xərcləri üstələdiyindən əməliyyat mənfəəti 130 milyon 560 min manat təşkil edib. 2020-ci ildə  "Azərenerji" ASC-nin cəmi əməliyyat gəlirləri 1 milyard 122 milyon 327 min manat, cəmi əməliyyat xərcləri 1 milyard 25 milyon 131 min manat, gəlirlər xərcləri üstələdiyindən əməliyyat mənfəəti 97 milyon 196 min manat təşkil etmişdi. Cəmi əməliyyat gəlirlərinin 198 milyon 8 min manat artmasına qarşılıq, cəmi əməliyyat xərcləri 164 milyon 644 min manat artıb. GƏlirlər xərclərdən daha çox artdığı üçün şirkətin əməliyyat mənfəətində 33 milyon 364 min manat artım yaranıb. 

Ötən il "Azərenerji" ASC xarici valyutasının mübadilə əməliyyatlarına görə 84 milyon 420 min manat gəlir əldə edib (2020-ci ildə 83 milyon 790 min manat zərər etmişdi).

2022-ci il yanvarın 1-nə “Azərenerji”nin aktivləri 4 milyard 147 milyon 832 min manat olub ki, bu da 1 il əvvələ nisbətən 3 % çoxdur. Hesabat dövründə səhmdar cəmiyyətinin öhdəlikləri 3 % azalaraq 2 milyard 503 milyon 293 min manata düşüb, balans kapitalı isə 13,65 % artaraq 1 milyard 644 milyon 539 min manata çatıb.

Səhmləri 100% dövlətə məxsus olan “Azərenerji” Açıq Səhmdar Cəmiyyəti ölkənin elektroenergetika sisteminin fəaliyyətini təmin etməklə, elektrik enerjisinin istehsalı və ötürülməsinin, vahid mərkəzdən idarə olunan elektrik stansiyalarının, yarımstansiyaların, sistemtəşkiledici yüksək gərginlikli – 110, 220, 330, 500 kilovoltuq elektrik verilişi xətlərinin və onların dispetçer idarəetmə vasitələrinin koordinasiyasını həyata keçirir. 

Azərbacan Respublikası Prezidentinin 4 sentyabr 2018-ci il tarixli sərəncamı ilə Balababa Rzayev "Azərenerji" ASC-nin prezidenti təyin edilib.