Rusiya prezidenti Vladimir Putinin inkişaf etməkdə olan ölkələrin Ukrayna taxılına dair təhlükəsiz dəhliz sazişindən faydalanmadıqları ilə bağlı iddiaları rəqəmlərlə dəstəklənmir.

Marja xəbər verir ki, Putin razılaşmanı "aldadıcı" adlandırmasına baxmayaraq, saziş çərçivəsində 2 milyon tondan çox taxılın əhəmiyyətli hissəsi inkişaf etməkdə olan ölkələrə çatıb.

Putin bildirib ki, “taxılın demək olar ki, hamısı” Avropa Birliyi ölkələrinə gedir. Birləşmiş Millətlər Təşkilatının məlumatlarına görə, Ukraynadan çıxan gəmilərlə daşınan təxminən 400 min tondan çox kənd təsərrüfatı məhsulları Afrikaya, 600 min tondan çoxu isə Asiya və Yaxın Şərqə çatdırılıb.

Taxılın Misir, Somali, Keniya və Sudana da çatdırılma həyata keçirilib. Həmçinin BMT-nin məlumatına görə, dünyanın ən böyük un daşıyıcısı olan Türkiyə daxil olan taxılların bir hissəsini üyüdərək yenidən ixrac edə bilər.

Türkiyə və Birləşmiş Millətlər Təşkilatının vasitəçiliyi ilə əldə olunan razılaşma qlobal taxıl qiymətlərinin və ərzaq inflyasiyasının aşağı düşməsinə kömək edib. Putinin son açıqlamaları 120 günlük razılaşmanın gələcəyini mübahisəli edib.

Avropa İttifaqı ölkələri qarğıdalı, buğda və bitki yağı daxil olmaqla tədarükün üçdə ikisini alıb. Ölkələrin reytinqində Türkiyədən sonra ən çox çatdırılma İspaniyaya edilib.

BMT-nin sözçüsü Stephane Dujarric çərşənbə günü deyib: "Bu təşəbbüs topdansatış səviyyəsində qlobal qiymətləri aşağı salmaq məqsədi daşıyır. Dünya Ərzaq Proqramı çərçivəsində Ukrayna taxılı Efiopiya üçün Cibutiyə çatdırılır. Yəmənə də çatdırılmalar həyata keçiriləcək”.

Rusiya müharibə başlayandan bəri böyük miqdarda taxıl ixrac edib. Lakin mövsümün əvvəlindən sanksiyaların dolayı təsiri olaraq daşıma şirkətləri maliyyə və logistik çətinliklərlə üzləşib.

Rusiya rəsmiləri bu həftə Cenevrədə BMT nümayəndələri ilə Rusiyanın qida və gübrə ticarəti ilə bağlı problemləri müzakirə ediblər.

Xatırladaq ki, Şərq İqtisadi Forumunda çıxış edən Rusiya Prezidenti Vladimir Putin 80 gəmidən yalnız ikisinin aşağı gəlirli ölkələrə getdiyini və buna görə də sövdələşmənin inkişaf etməkdə olan ölkələr üçün “dələduzluq” olduğunu bildirib:

"Gördüklərimiz başqa bir həyasızcasına saxtakarlıqdır. Bu, bizimlə bağlı deyil, bu, beynəlxalq ictimaiyyətin aldadılması, Afrikadakı, ərzağa ciddi ehtiyacı olan digər ölkələrdəki tərəfdaşların aldadılmasıdır, bu, sadəcə olaraq bir dələduzluq, alçaq və həyasızlıqdır”.

Həmçinin oxu

Putindən taxıl dəhlizi ilə bağlı sərt tənqid - “Fırıldaqdır, Rusiya aldandı”