"Azərbaycan Sənaye Bankı" ASC 2022-ci ilin ilk 6 ayını (yanvar-iyun dövrünü) 3 milyon 2 min manat xalis mənfəət ilə başa vurub. Bank ötən ilin eyni dövrünü 1 milyon 113 min manat xalis mənfəət ilə bağlamışdı. 2021-ci ilin birinci yarısı ilə müqayisədə 2022-ci ilin birinci yarısında "Azərbaycan Sənaye Bankı" ASC-nin xalis mənfəəti 2,7 dəfə artıb.

Marja xəbər verir ki, "Azərbaycan Sənaye Bankı"nın faiz gəlirləri 2021-ci ilin ilk 6 ayında 14 milyon 359 min manat ikən, 2022-ci i ilin ilk 6 ayında 12 milyon 133 min manata düşüb. Bankın qeyri-faiz gəlirləri isə 2 milyon 965 min manatdan 4 milyon 278 min manata yüksəlib.

2022-ci ilin yanvar-iyun dövründə "Azərbaycan Sənaye Bankı" ASC-nin cəmi əməliyyat gəlirləri 16 milyon 411 min manat, cəmi əməliyyat xərcləri 13 milyon 413 min manat, gəlirlər xərcləri üstələdiyindən əməliyyat mənfəəti 2 milyon 947 min manat təşkil edib. Eyni zamanda aktivlər üzrə mümkün zərərlərin ödənilməsi üçün xüsusi ehtiyatdan azad olmuş  azad olmuş 816 min manat mənfəətə əlavə edilib. Bank 3 milyon 763 min manat mənfəətindən 761 min manat mənfəət vergisi ödəyib.

Qeyd edək ki, 2021-ci ilin yanvar-iyun dövründə "Azərbaycan Sənaye Bankı" ASC-nin cəmi əməliyyat gəlirləri 17 milyon 324 min manat, cəmi əməliyyat xərcləri 15 milyon 445 min manat, əməliyyat mənfəəti 1 milyon 879 min manat, aktivlər üzrə mümkün zərərlərin ödənilməsi üçün xüsusi ehtiyata ayırma 483 min manat, ödənilmiş məmfəət vergisi 283 min manat təşkil etmişdi.

BANK KİÇİLİB

30 İyun 2022-ci il tarixində "Azərbaycan Sənaye Bank" ASC 737 milyon 933 min manat cəmi aktivlərə, o cümlədən 256 milyon 447 min manat kredit portfelinə (müştərilərə verilmiş kreditlər) malik olub. Bank ötən ilin sonunda 812 milyon 561 min manat cəmi aktivlərə, o cümlədən 243 milyon 593 min manat kredit portfelinə malik idi. "Azərbaycan Sənaye Bankı"nın digər banklardakı depozitləri 467 milyon 295 min manatdan 384 milyon 897 min manata düşüb.