Asiya İnkişaf Bankının (AİB) gözləntilərinə görə, bu il Azərbaycanda fiskal siyasət ekspansionar olaraq qalacaq.

AİB-in yeni "Asian Development Outlook 2022" hesabatına görə, bu səbəbdən 2022-ci ildə dövlət büdcəsinin kəsiri ÜDM-in 3,1%-dək genişlənəcək, lakin 2023-cü ildə daha az ekspansionar siyasətin tətbiq olunacağı fonunda, kəsirin ÜDM-in 1,5%-nə qədər daralacağı gözlənilir. Bu zaman, nominal ÜDM-in artımı bir daha büdcə gəlirlərinin artım tempini üstələyəcəyinə görə, gəlirlərin nominal ifadədə azacıq yüksələcəyi, lakin 2022-ci ildə ÜDM-in 28,1%-ə, 2023-cü ildə isə 27,6%-ə enəcəyi proqnozlaşdırılır.

Hesabatda qeyd edilir ki, Dövlət Vergi Xidməti üzrə büdcəyə daxilolmaların azalmasının kompensasiyası məqsədilə Dövlət Neft Fondundan transfertlərin 2022-ci ildə 12% artacağı, beliklə də ümumi büdcə gəlirlərinin yarısını təmin edəcəyi, yeni büdcə qaydası qəbul edildikdən sonra isə 2023-ci ildə 9,5% azalacağı gözlənilir.

"İqtisadi fəaliyyətin dəstəklənməsi üçün dövlət tərəfindən 3 mlrd. ABŞ dolları məbləğində yeni yardım paketinin, o cümlədən Qarabağda yenidənqurma işləri üzrə investisiya planlarının qəbul edilməsi ilə əlaqədar dövlət xərclərinin 2022-ci ildə ÜDM-ə nisbətinin 31,3%-ə çatacağı, 2023-cü ildə isə ÜDM-in 29,2%-ə enəcəyi proqnozlaşdırılır. 2022-ci ilin yarımillik yekunlarına əsasən büdcənin icra göstəricilərindən çıxış edərək investisiya qoyuluşlarına ayrılan vəsaitin məbləği artırıla bilər", - hesabatda bildirilir.

AİB-ə görə, büdcə kəsirinin maliyyələşməsi məqsədilə dövlət borcunun və dövlət zəmanətli borcunun, əsas etibarilə daxili bazarda maliyyə vəsaitlərinin cəlb edilməsi sayəsində 2022-ci ildə ÜDM-in 19,3%-dək yüksləcəyi, 2023-cü ildə isə dövlətin borcun idarəolunması strategiyasına uyğun olaraq 18,8%-ə düşəcəyi gözlənilir. 2022-ci ildə xarici mənbələrdən borclanmanın və dövlət zəmanətlərinin 800 mln. dollar civarında saxlanması planlaşdırılır.

Xatırladaq ki, 2021-ci il üçün dövlət büdcəsinin gəlirləri 26 396,3 mln manat və ya ÜDM-in 28,4%-ini, xərcləri isə 27 422,4 mln. manat və ya ÜDM-in 29,5%-ini təşkil edib. Nəticədə, büdcə kəsiri 1 026,1 mln. manata və ya ÜDM-in 1,1%-ə bərabər olub.

KREDİTİ ONLAYN əldə et – 10 000 AZN-dək, 0% komissiya

APA