Rusiya milyarderlərinin ümumi sərvəti Ukraynadakı hərbi əməliyyatlar səbəbindən 38,162 milyard dollar azalıb. Marja xəbər verir ki, bu barədə “Forbes” jurnalı məlumat yayıb.

Nəşrin məlumatına görə, ən böyük itkini  5,4 milyard dollarla “Lukoyl”un prezidenti Vahid Ələkbərov çəkib, onun sərvəti 19,5 milyard dollara qədər düşüb.

“Novatek”in rəhbəri Leonid Mixelson 4 milyard dollar, “Sibur” və “Novatek” şirkətlərinin direktorlar şurasının üzvü Gennadi Timçenko 3,9 milyard dollar itiriblər.

“Severstal”ın direktorlar şurasının sədri və əsas səhmdarı Aleksey Mordaşov 3,5 milyard dollar itirib “Norilsk Nikel”in prezidenti Vladimir Potaninin sərvəti 3,3 milyard dollar azalıb.

Xəbər, reytinq real vaxt rejimində dünyanın ən varlı adamlarının sərvətindəki dəyişikliyi qiymətləndirən Forbes Real-Time sayğacının məlumatlarına əsaslanır. Rusiyalı milyarderlərin gündəlik itkiləri ilə bağlı məlumatlar Moskva vaxtı ilə saat 13:00-a hesablanıb.

Ukraynadakı hərbi əməliyyatlar haqqında

Rusiya prezidenti Vladimir Putin cümə axşamı səhər qondarma Donbass respublikalarının rəhbərlərinin müraciətinə cavab olaraq xüsusi hərbi əməliyyat keçirmək qərarına gəldiyini bildirib. Rusiya lideri vurğulayıb ki, Moskvanın planlarına Ukrayna ərazilərinin işğalı daxil deyil.

Rusiya Federasiyasının Müdafiə Nazirliyi Rusiya ordusunun Ukrayna şəhərlərinə zərbələr endirmədiyini, hərbi infrastrukturun yüksək dəqiqlikli vasitələrlə sıradan çıxarıldığını bildirib. 

Cümə axşamı günü bazarın düşməsi haqqında

Cümə axşamı günü ticarət zamanı Moskva birjası və RTS indeksləri 45-48%-dən çox ucuzlaşıb. Cümə axşamı günü ticarət zamanı Moskva birjasının indeksi 2017-ci ilin fevralından bəri ilk dəfə 1700 bənddən aşağı düşüb. RTS dollar indeksi 2016-cı ilin fevralından bəri ilk dəfə olaraq 700 bənddən aşağı düşüb və kapitallaşmada 76 milyard dollar itirib.

Rubl dollar və avro qarşısında rekord ucuzlaşıb.