Rusiya prezidenti Vladimir Putinin Ukraynaya 100 minlik qoşun yeritmək və NATO-ya 1997-ci il sərhədlərinə çəkilməsi tələbi ilə ultimatum verməsi varlı ruslar arasında - oliqarxlardan tutmuş iri biznesmenlərə qədər səssiz ümidsizliyə səbəb olub.

Qərb Rusiyanı tənəzzül, maliyyə sisteminə zərbə və ən sərt sanksiyalarla hədələsə də, biznes elitaları Kremlin təhlükəli oyununun nəticələrini açıq şəkildə şərh etməkdə tərəddüd edirlər.

Marja xəbər verir ki, adının açıqlanmasını istəməyən bir investisiya bankiri “The Moscow Times”a deyib: "Heç kim müharibə istəməsə də, böyük biznesin ayağa qalxıb fikir ayrılıqlarını səsləndirməsini gözləməyin. İş adamları müharibəni ancaq öz mətbəxlərində müzakirə edəcəklər. Hamı ictimaiyyət qarşısında susacaq".

Cəmi bir il əvvəl 29,1 milyard dollar sərvəti ilə ölkənin ən varlı adamı olan “Severstal and Power Machines”in sahibi milyarder Aleksey Mordaşov xarici iqtisadi təcrid vəziyyətində Rusiya üçün “fəlakət” olacağını proqnozlaşdırmışdı. Bir az əvvəl Hesablama Palatasının rəhbəri Aleksey Kudrin xəbərdarlıq etmişdi ki, əgər ölkə hazırkı xarici siyasətin onu aparıcı dövlətlər dairəsinə qaytarması illüziyasından əl çəkməsə, SSRİ-nin taleyi ilə üzləşəcək.

Kremlin imperiya ambisiyaları getdikcə güclənməkdədir.

Əvvəllər danışmaqda azad olanlar indi dillərini udubular. Kremldən çəkinən milyarderlər və məmurlar baş verə biləcəkləri qəbul etməyə məcbur olurlar.

Forbes siyahısındakı bir iş adamı "Əllərimiz bağlıdır" deyə şikayətlənir. O, Qərblə münasibətlərin daha da pisləşməsini gözləyir ki, bu da istər-istəməz iqtisadiyyata mənfi təsir göstərəcək.

"Ancaq böyük biznes sadəcə bununla yaşamalı olacaq" iş adamı deyib. “Öncədən plan qurmaq və ya hansısa şəkildə maraqlarımızı qorumağa çalışmaq mümkün deyil, çünki biz nə olacağını və Qərbin necə reaksiya verəcəyini bilmirik”.

Hətta onların aktivlərini mümkün müharibədən xilas etmək çox gecdir. İnvestisiya bankiri deyir ki, hadisələr o qədər sürətlə inkişaf edib ki, zəngin insanlar çox az şey edə bilirlər.

İlin əvvəlindən Rusiya fond bazarı 20% çökərək şirkətlərə yatırılan 150 milyard dolları RTS indeksindən silib. Rusiya səhmləri oktyabrın zirvəsindən bəri 33% ucuzlaşıb, lakin yalnız bir neçə hökumət insayderi nə satacağını əvvəlcədən bilirdi.

Moskva rəsmisi “The Moscow Times”a deyib: "Donbasla birbaşa əlaqəsi olan uşaqlarla bir neçə söhbətdən sonra mən bütün aktivlərimi dollara çevirdim və Rusiyadakı səhmlərimi satdım".

Son 20 ildə 800 milyard dollar xalis kapital axını yaşayan Rusiya iqtisadiyyatı ötən il daha 72 milyard dollarlıq kapital çıxışına məruz qalıb ki, bu da Krımın ilhaqından sonra ən böyük göstəricidir. ING-nin Rusiya və MDB üzrə baş iqtisadçısı Dmitri Dolqin qeyd edib ki, bu məbləğin demək olar ki, üçdə ikisi - 52 milyard dollar qeyri-maliyyə sektoru xarici aktivlərə birbaşa investisiyalardan əldə edilib.